ڈیرہ غازی خان۔ 07 ستمبر(اے پی پی)ڈیرہ غازی خان دے علاقے تھاݨہ شاہ صدر دین اچ ڈاکوواں نال مقابلے اچ ھک کانسٹبل شہید اتے ھک زخمی تھی ڳئے ۔تفصیل موجب ایس ایچ او شاہ صدر دین عرفان مصطفیٰ اپݨی ٹیم دے رلے پل بصیرہ دے نیڑے گشت تے ہن جو ھک موٹرسائیکل جیں تے ترائے بندے سوار ہں ، پولیس کوں ݙیکھ تے اندھا دھند فائرنگ کرݙتی تے بھڄ ڳئن ۔ملزمان دی فائرنگ توں کانسٹیبل غلام حسن اتے منیر احمد شدید زخمی تھی ڳئے جنہاں کوں وختی ٹراما سنٹر ڈیرہ غازیخان منتقل کیتا ڳیا ۔بعد اچ کانسٹیبل غلام حسن زخماں دی تاپ نہ جھلیندے ہوئیں شہید تھی ڳئے ۔واقعہ دی اطلاع ملدے ہی آر پی او کیپٹن (ر) سجاد حسن خان وختی ٹیچنگ ہسپتال ڈی جی خان پڄ ڳئے تے زخمی اہلکار دی عیادت کیتی۔ایں موقع تے ڈسٹرکٹ پولیس آفیسر ڈیرہ غازی خان حسن افضل وی انہاں دے رلے ہن ۔آر پی او فرض دی ادائیگی اچ شہید تھیوݨ آلے اہلکار کوں خراج تحسین پیش کیتا تے ڈی پی او ڈیرہ غازی خان کوں واقعہ دی مکمل انکوائری کرݨ تے واقعہ اچ ملوث مجرماں دی وختی گرفتاری دے احکامات جاری کیتے۔آر پی او دے حکم تے مجرماں دی گرفتاری کیتے سخت ناکہ بندی کرݙتی ڳئی ۔ مجرماں دی گرفتاری سانڳے سپیشل ٹیماں بݨا تے علاقہ اچ سرچ آپریشن جاری اے۔
