ملتان۔ 13 ستمبر (اے پی پی) جنوبی پنجاب دے کچے دے علاقے اچ مستقل بنیاداں تےامن وامان برقراررکھݨ کیتے اہم اقدامات کیتے ڳئن۔ کچے دے علاقے اچ پولیس دے2بیس کیمپ اتے19چیک پوسٹیں ٻݨاوݨ اتے ترائے بکتر بند گاݙیاں گھنݨ دا وی فیصلہ کیتا ڳئے۔محکمہ پلاننگ اینڈ ڈویلپمنٹ پنجاب منصوبے کیتے 1ارب94 کروڑ روپے دی منظوری ݙے ݙتی ڳئی اے۔ اے فیصلہ جنوبی پنجاب سیکرٹریٹ اچ کچے دے علاقے اچ انفراسٹرکچر دی ترقی بارے اہم اجلاس اچ کیتا ڳئیا۔ ایڈیشنل چیف سیکرٹری جنوبی پنجاب کیپٹن(ر) ثاقب ظفراتےایڈیشنل آئی جی پولیس جنوبی پنجاب مقصود الحسن وی اجلاس اچ شریک تھیے۔ ایں دے علاوہ آر پی او ڈی جی خان،آر پی او بہالپور، ڈی پی او رحیم یار خان اتے ڈی پی او راجن پور وی اجلاس اچ ورچوئل شریک تھیے۔ ایں موقع تے ایڈیشنل چیف سیکرٹری جنوبی پنجاب کیپٹن(ر) ثاقب ظفر آکھیا جو کچے دے علاقے کیتے اے منصوبہ نگران وزیراعلیٰ پنجا ب محسن نقوی دی ہدایت تے تیار کیتا ڳئے۔
