اسلام آباد۔24ستمبر(اے پی پی) پاکستان اچ متحدہ عرب امارات دے سفیر حماد عبید الزہبی آکھیے کنونشن اچ شامل فریقین دی آندی 28ویں کانفرنس پاکستان کیتے موسمیاتی تبدیلیاں توں ساریں توں ودھ متاثر تھیوݨ آلے ملکاں دی مدد کرݨ بارے ڳالھ کرݨ دا ٻہوں چنڳاں موقع ہوسی ۔عرب نیوزنال انٹرویو اچ انہاں آکھیے پاکستان موسمیاتی تبدیلیاں توں متاثر تھیوݨ آلے سرفہرست پنج ملکاں اچوں ھک اے ۔ انہاں مزید آکھیے جو پاکستانی وفد جیڑھا دبئی ایکسپو اچ سی او پی اٹھاویویں کانفرنس اچ شرکت کرݨ ویندا پئے انہاں کیتے بہترین موقع اے جو او موسمیاتی تبدیلیاں توں متاثرہ ملکاں دی مدد بارے مزید ڳالھ مہاڑ کرن ۔متحدہ عرب امارات دے سفیر آکھیے اساں موسمیاتی تبدیلیاں دے حوالے نال حکومت پاکستان نال رل تے کم کریندے پیوں تے ایں سلسلے اچ اساں کنے ٻہوں سارے منصوبے تے ٻہوں ساریاں ذمے واریاں لڳدن ۔ انہاں آکھیے اٹھاویویں سی او پی کانفرنس عالمی برادری کیتے دبئی اچ آب و ہوا متعلق چیلنج نال نبݨݨ کیتے زیادہ مصروفیت اتے مزید مذاکرات کیتے جمع تھیوݨ دا ھک موقع ہوسی ۔ عرب نیوز دی رپورٹ موجب گزریل سال مصر دی طرفوں سی او پی 27ویں کانفرنس دی میزبانی دے بعد متحدہ عرب امارات موسمیاتی کانفرنس دی میزبانی کرݨ آلی ݙوجھی عرب ریاست ہوسی۔ انہاں آکھیے یو اے ای 30 نومبر توں 12 دسمبر تئیں سی او پی اٹھاویویں کانفرنس دی میزبانی کریسی، عالمی کانفرنس اچ تقریباً 70,000 لوکاں دی شرکت متوقع اے، جنہاں اچ سربراہان مملکت، سرکاری حکام، بین الاقوامی صنعت دے رہنما، نجی شعبے دے نمائندے، ماہرین تعلیم، ماہرین، نینگرتے غیر ریاستی وفد وی شامل ہوسن۔ پاکستان دا شمار دنیا اچ موسمیاتی تبدیلیاں توں ساریں توں ودھ متاثر تھیوݨ آلے ملکاں اچ تھیندے ۔ انہاں آکھیے جون 2022 اچ ساوݨ دے غیر معمولی مینھ تے گلیشیئرزپگھلݨ پاروں آوݨ آلی چھل 1,700 توں ودھ لوکاں دیاں جاناں ڳھدیاں تے فصلاں دا وݙا حصہ وہہ ڳیا جیں توں انفراسٹرکچر کوں ضیان پڄیا ، پاکستان سیلاب توں تھیوݨ آلے ضیان تے معاشی ضیان دا تخمینہ 30 بلین ڈالر توں ودھ لاتے ۔
