ملتان۔ 28 ستمبر(اے پی پی) ایڈیشنل چیف سیکرٹری جنوبی پنجاب کیپٹن(ر) ثاقب ظفر آکھیے بے نظیر انکم سپورٹ پروگرام دے تحت مستحقین سانگے جاری کیتے ڳئی امداری رقم دی شفاف ترسیل سانڳے انتظامیہ ہر ممکن تعاون کریسی ۔ تفصیل موجب خمیس دے ݙینھ ایڈیشنل چیف سیکرٹری ساوتھ پنجاب کیپٹن(ر) ثاقب ظفرنال ڈی جی بے نظیر انکم سپورٹ پروگرام پنجاب ندیم عالم بٹ ملاقات کیتی۔ ڈی جی بی آئی ایس پی پنجاب مسحقین دے نال فراڈ اتے نو سربازی کرݨ آلے مافیادے خلاف کریک ڈاون کیتے انتظامیہ دی طرفوں مدد کیتے ایڈیشنل چیف سیکرٹری جنوبی پنجاب توں درخواست کیتی۔جیں تے انہاں ہر ممکن تعاون ݙیوݨ دا یقین ݙویندے ہوئیں جنوبی پنجاب دے سارے ضلعیں دے ڈپٹی کمشنرز کوں مراسلہ جاری کرݨ دی ہدایت کیتی ۔ثاقب ظفر آکھیے سارے ڈپٹی کمشنر اپݨے ضلعیں اچ امدادی رقم دی شفاف ترسیل سانڳے فوکل پرسن مقرر کریسن ،فوکل پرسن پولیس دی مدد نال مستحقین نال فراڈ کرݨ آلیں دے خلاف کاروائی کریسن ،مستحقین سانڳے امداد دی وصولی دے موقع تے بہترین انتظامات کیتے ویسن ۔ ڈی جی بی آئی ایس پی آکھیے بے نظیر انکم سپورٹ پروگرام دے تحت مستحقین کیتے اڄوکے مالی سال دی پہلی قسط جاری کرݙتی ڳئی ،جنوبی پنجاب دے 22 لکھ خاندان مالی امداد توں فیدہ چیسن ،ہر خاندان کوں 9 ہزار روپےملسن ،امدادی رقم دی منظم ترسیل سانڳے جنوبی پنجاب اچ حبیب بینک دے 1900 منظور شدہ فرینچائزر مقرر کیتے ڳئن ۔انہاں آکھیے امدادی رقم دی پرامن اتے شفاف ترسیل سانڳے انتظامیہ دا تعاون ضروری اے۔
