غزہ اچ 2لکھ 60ہزارتوں ودھ لوک بے گھر تھئن ،اقوام متحدہ

مقبوضہ بیت المقدس ۔11اکتوبر(اے پی پی) اقوام متحدہ آکھیے غزہ دی پٹی اچ 260,000 توں ودھ لوک آپݨے گھر ٻار چھوڑݨ تے مجبور تھی ڳئن ۔عرب نشریاتی ادارے موجب  اقوام متحدہ دے انسانی ہمدردی دے ادارے او سی ایچ اے ھک بیان اچ آکھیے جو غزہ اچ    فلسطینیاں تے بمباری دے نتیجے اچ 2لکھ 60ہزارتوں ودھ لوک آپݨا گھر ٻار چھوڑ چکئن ۔ انہاں فلسطینی حکام دا حوالے ݙیندے ہوئیں آکھیے جو بمباری دی مہم 1,000  توں ودھ مکان تباہ کرݙتن تے 560 کوں ٻہوں ضیان پڄے او ہݨ ناقابل رہائش ہن۔انہاں آکھیے جو لوک جیڑھے بے گھر نی تھئے انہاں کیتے بنیادی ضرورتاں پوریاں کرݨ اوکھا تھیندا ویندے ۔انہاں مزید ݙسائے جو اسرائیل غزہ دی پٹی تے پہلے توں ہی ناکہ بندی کر رکھی اے اتے علاقے دا مکمل محاصرہ کرتے  خوراک، پاݨی، ایندھن دی ترسیل روک ݙتی اے تے ایں اقدام توں پہلے ہی سنگین انسانی صورتحال مزید خراب تھی ویسی ۔