بیجنگ۔18اکتوبر (اے پی پی) چین دے صدر شی جن پنگ آکھیا جو “بیلٹ اینڈ روڈ” تعاون منصوبہ بندی کوں حقیقت اچ بدل تے بین الاقوامی تعاون اچ وافر فیدے حاصل کیتن۔ گزریل ݙاہ سالیں اچ اقتصادی راہداری دی تعمیر بارے وݙے چیلنجز اتے انفارمیشن ہائی ویز کوں اہمیت ݙیندیں ہوئیں ریلوے سڑکاں، ہوائی اݙے، بندر گاہیں اتے پائپ لائن نیٹ ورکس دے ذریعے مختلف ملکاں وچال مصنوعات، سرمائے، ٹیکنالوجی اتے عملے دی وݙے پیمانے تے گردش کوں ودھائے۔ اے ڳالھیں انہاں بدھ کوں بیجنگ اچ تریجھے بیلٹ اینڈ روڈ فورم برائے بین الاقوامی تعاون دے افتتاحی اجلاس توں خطاب کریندیں ہوئیں آکھی۔ انہاں اے ڳالھ تے زور ݙتا جو “بیلٹ اینڈ روڈ” دی سانجھی تعمیر ،سانجھی ترقی اتے ڳالھ مہاڑ تے تعاون کوں ودھیندی پئی اے۔ اساں نظریاتی محاذ آرائی جغرافیائی سیاسی گیمز، بلاک سیاسی محاذ آرائی، ہک پاسہ پابندیاں، معاشی جبر اتے “ڈی کپلنگ” دا بلکل حصہ کائنی۔ آپݨے خطاب اچ شی جن پنگ “بیلٹ اینڈ روڈ” دی اعلیٰ معیار دی سانجھی تعمیر دی حمایت کیتے چین دے اٹھ اقدامات دا اعلان کیتا۔ انہاں اچ بیلٹ اینڈ روڈ کیتے سہ جہتی رابطہ نیٹ ورک دی تعمیر،کھلے پن تے مبنی عالمی معیشت ٻݨاوݨ دی حمایت، عملی تعاون، ماحول دوست ترقی ،سائنسی اتے تکنیکی جدت طرازی ، مختلف ملکاں دی عوام وچال رابطے، بدعنوانی توں پاک راستہ اتے “بیلٹ اینڈ روڈ” بین الاقوامی تعاون دے میکانزم کوں بہتر کرݨ شامل اے۔ انہاں آکھیا جو کورونا وائرس دی وبا دے بعد “بیلٹ اینڈ روڈ” زندگی اتے صحت دا راہ ٻݨ ڳئے۔ چین مختلف ملکاں کوں ارباں ماسک اتے ویکسین دی ݙو ارب 30 کروڑ خوراکاں ݙتن۔ 10 سالہ تاریخ ثابت کیتے جو بیلٹ اینڈ روڈ دی سانجھی تعمیر تاریخ دا درست انتخاب اے اتے زمانے دی ترقی دی منطق دے عین مطابق اے۔
