ملتان۔ 01 نومبر (اے پی پی) ایڈیشنل چیف سیکرٹری جنوبی پنجاب کیپٹن(ر) ثاقب ظفر نشتر ہسپتال دے گائنی آوٹ ڈور شعبہ دا دورہ کیتا اتے بعد اچ ایں بارے آپݨے دفتر اچ تھیوݨ آلے اجلاس دی صدارت کیتی۔ اجلاس اچ نشتر ہسپتال اچ اینٹی ریپ کرائسز سیل ٻݨاوݨ بارے معاملیاں تے ڳالھ کیتی ڳئی۔ سیکرٹری ویمن ڈویلپمنٹ ڈیپارٹنمنٹ پنجاب سمیرا صمد ، سیکرٹری سپیشلائزڈ ہیلتھ کئیر افضل ناصر خان، سیکرٹری سروسز انجینئر امجد شعیب خان ترین،ڈپٹی کمشنر رانا رضوان قدیر، وائس چانسلر نشتر میڈیکل یونیورسٹی پروفیسر ڈاکٹر رانا الطاف، ایم ایس ڈاکٹر امجد راو ، منیجر انسداد تشدد مرکز برائے خواتین منیزہ بٹ، یو این ویمن دی نیشنل کوآرڈنیٹر نادیہ اتے پنجاب کوآرڈنیٹر سدرہ ہمایوں دے علاوہ سینئر پولیس افسر اجلاس اچ شریک تھیے۔ نشتر ہسپتال اچ اینٹی ریپ کرائسز سیل ٻݨاوݨ بارے جاری کماں دا جائزہ ڳھدا ڳئیا۔ ایڈیشنل چیف سیکرٹری جنوبی پنجاب اجلاس وچال نشتر اچ اینٹی ریپ کرائسز سیل ٻݨاوݨ کوں احسن اقدام قرار ݙیندیں ہوئیں آکھیا جو اینٹی ریپ کرائسز سیل جنسی تشدد دا شکار تریمتیں کیتے انصاف ڳھنݨ دا باعث ٻݨسی۔ یو این وومن کوآرڈنیٹر برائے پنجاب سدرہ ہمایوں ݙسیا جو اینٹی ریپ کرائسسز سیل ٻالاں اتے ٹرانس جینڈر دے نال جنسی تشدد دے کسیز اچ وی تعاون کریسی اتے سیل چووی گھنٹے کم کریسی۔ سیل دا افتتاح ایں مہینے دے ادھ اچ کیتا ویسی۔
