اسلام آباد۔4نومبر (اے پی پی) پاکستان داغزہ اچ بنیادی ضرورتاں کوں پوراݨ سانڳے وختی جنگ بندی دی ضرورت تے زور ݙیندے ہوئیں اسرائیل ولوں فلسطینی عوام دی جاری “نسل کشی” روکݨ دا مطالبہ کیتے ۔اقوام متحدہ اچ پاکستان دے مستقبل مندوب منیر اکرم اقوام متحدہ دے ہیڈکوارٹرز اچ فلسطینی علاقیں دی صورتحال تے بریفنگ اچ ݙسائے جو محصورزدہ غزہ اتے فلسطینی علاقیں اچ جنگ بندی ضروری اے۔پاکستانی مندوب آکھیے اساکوں واضح الفاط اچ اسرائیلیاں کوں ݙساوݨا ہوسی جو او فلسطینیاں دی نسل کشی بند کرے ۔اقوام متحدہ دے انسانی ہمدردی دے کوآرڈینیٹر مارٹن گریفتھس اتے مشرق وسطی دے امن عمل کیتے ڈپٹی سپیشل کوآرڈینیٹر لین ہیسٹنگز ،جنہاں ہݨے ہی فلسطینی علاقیں دا دورہ کیتے ، انہاں رکن ملکاں کوں اسرائیل-فلسطین جھیڑے تے تازہ ترین پیش رفت دا ݙسائے ۔ ݙوہیں عہدیداراں خوراک، ایندھن اتے ٻئیاں ضروری چیزاں دی محفوظ ترسیل کوں یقینی بݨاوݨ کیتے انسانی بنیاداں تے جنگ بندی دا مطالبہ کیتے۔ پاکستانی مندوب اپݨے خطاب اچ آکھیے جو اسرائیلی ہولوکاسٹ دا شکار تھیوݨ دے باوجود ہݨ فلسطینیاں دے خلاف “جدید نسل کشی” دا ارتکاب کریندے پئن ۔ انہاں بین الاقوامی قوانین دے احترام تے انہاں تے عمل کرݨ دی لوڑھ تے زور ݙتے جیڑھے جو شہریاں تے املاک تے حملیں توں روکیندن ۔
