اسلام آباد۔07 نومبر(اے پی پی) مہاندرے سرائیکی دانشور، سینئر صحافی ارشاد امین کوں لاہور اچ دفنا ڈتا گئے۔ او کڄھ ݙینھ توں ملتان اچ ہن ٻھل اچݨ چیت بیمار تھیوݨ پاروں انھاں کوں ہسپتال اچ داخل کرایا گیا اتے او آݙت دی شام او ڄق توں پردہ کر ڳن اتے اللہ کوں پیارے تھی ڳن۔ ارشاد امین معروف لکھاری، صحافی، پارت رسالہ اتے سرائیکی تحریک دے اڳواݨ ہن۔ انھاں دا تعلق چاچڑاں شریف ضلع رحیم یارخان دے پہوڑ خاندان توں ہا۔ بعد اچ چاچڑاں شریف توں لاہور منتقل تھی گئے اتے لاہور کوں آپݨا مستقل ٹھکاݨاں ٻݨا گھدا۔ ارشاد امین 1983 اچ چاچڑاں شریف اچ سرائیکی ادبی تے ثقافتی میلہ کروایا جیندے اچ پہلی واری پورے ملک توں دانشوراں، شاعراں، گلوکاراں اتے ادیباں شرکت کیتی۔ اے میلہ سرائیکی ادبی، ثقافتی تے صوبے دی تحریک اچ اہم موڑ ثابت تھیا۔ ارشاد امین دی صدارت اچ سرائیکی زبان دا اخبار” سڄاک” وی انھاں دی وجہ شہرت ٻݨیا جیندے اچ ملخ دے معروف صحافی روف کلاسرہ وی کم کیتا ہا۔ انھاں لاہور اچ سرائیکی پبلی کیشن ٻݨایا جیندے تحت اسماعیل احمدانی دا ناول ” چھولیاں” اتے خواجہ غلام فرید دا دیوان شائع تھیا ۔ او ہک علم تے ادب دوست انسان ہا جیں پوری حیاتی علم دی خدمت کیتی ۔۔انھاں دی اولاد اچ ہک دھی اے ۔
