نیویارک۔8نومبر (اے پی پی):اقوام متحدہ دے سیکرٹری جنرل انتونیوگوتریش درد مندانہ اپیل کیتی اے جو غزہ اچ محصور تے فاقہ کشی دا شکار 23 لکھ توں ودھ فلسطینیاں کوں طبی سامان، خوراک،پیوݨ دا پاݨی تے لائٹنگ سہولتاں ݙیوݨ کیتے جنگ بند کیتی ونڄے ۔ گزریل ݙینھ جاری بیان اچ انہاں آکھیے جو غزہ اچ شہریاں دی ہلاکت اتے مسلسل تھیوݨ آلی انسانی تباہی جیں دا تصور وی نی کیتا ونڄ سڳدا او ٻہوں پریشان ہن ۔ انہاں آکھیے جو غزہ اچ انسانی ہمدردی بنیاداں تے جنگ بند کیتی ونڄے تاں جو اتھاں محصور لکھاں لوکاں کوں علاج معالجے تے خوراک دیاں سہولتاں ݙتیاں ونڄ سڳن ۔ اتھاں ،اقوام متحدہ دے ادارہ صحت دے ترجمان کرسچن لنڈمیئرآکھیے غزہ اچ ہر ݙینھ بدترین سڳدے ۔ انہاں التجا کیتی جو محصور شہریاں تئیں رسائی سانڳے جنگ بندی کیتی ونڄے ۔لنڈمیئر ݙسائے جو غزہ اچ موت اتے مشکلات دی سطح دا اندازہ لاوݨ اوکھا اے ،مقامی وزارت صحت دے اعداد و شمار موجب غزہ اچ روزانہ اوسطاً 160 ٻال ماریے ویندن تے مجموعی اموات 10,000 توں ودھ ڳئن جݙاں جو اسرائیلی بمباری اچ وی تیزی آڳئی اے تے زمین تے فوجی کارروائیاں بلا روک ٹوک جاری ہن۔لِنڈمیئر اصرار کیتے جو ہݨ جیڑھی چیز دی لوڑھ اے او ہے انسانی ہمدردی دی بنیاد تے جنگ بندی تے شہری آبادی نال یرغمالیاں دی تکلیف کوں مکاوݨ کیتے رسائی اے،ایں مقصد کیتے سفارتی کوششاں جاری ہن ۔ لنڈمیئر زندہ رہݨ کیتے پاݨی ، ایندھن، خوراک اتے صحت دی ݙیکھ بھال تئیں محفوظ رسائی دی لوڑھ تے زور ݙتے انہاں اقوام متحدہ دی طرفوں امداد گھن ونڄݨ آلے 500 ٹرکاں کوں غزہ اچ یومیہ بلا رکاوٹ اتے محفوظ رسائی دے مطالبے دا اعادہ کیتے۔
