اسلام آباد۔14نومبر(اے پی پی سرائیکی نیوز سروس) جڳ مشہور سرائیکی شاعر شاکر شجاع آبادی کوں اسلامیہ یونیورسٹی بہاولپور خصوصی کانووکیشن 2023 اچ انھاں دی خدمات تے پی ایچ ڈی دی اعزازی ڈگری ڈتی ڳئی اے ۔ سرائیکی نیوز سروس دی انچارج ڈاکٹر سعدیہ کمال نال ڈاکٹر محمد شفیع شاکر شجاع آبادی ٹیلی فون تےآپدی دھی ماریہ شاکر دے ذریعے خصوصی ڳالھ مہاڑ کریندے ہوئیں آکھیے جو اعزازی ڈگری دا ملݨ میں سانڳے نی بھل جو پورے وسیب سانگے ماݨ دی ڳالھ اے۔انہاں دا ٻیا آاکھݨ ہا جو میکوں اے اعزاز ملݨ میݙا کوئی کمال نی اے اللہ دی کرم نوازی اے۔واضح رہوے جوݙو ڈینھ پہلے اسلامیہ یونیورسٹی بہاولپور ولوں جڳ مشہور سرائیکی شاعر شاکر شجاع آبادی کوں انہاں دی سرائیکی وسیب کیتے خدمات دے اعزاز اچ پی ایچ ڈی دی اعزازی ڈگری ݙتی ڳئی۔کانووکیشن اچ گورنر پنجاب انجیئرمحمد بلیغ الرحمن خصوصی شرکت کیتی اتے وائس چانسلر اسلامیہ یونیورسٹی بہاولپور پروفیسر ڈاکٹر نوید اخترتے ڈین ڈاکٹر جاوید حسان چانڈیو توں علاوہ دانشوریں ،استادیں تے ادیبیں دی ہک وڈی تعداد موجود ہئی ۔ شاکر شجاع آبادی تے کالجاں تے یونیورسٹیاں اچ تحقیقی کم کیتا ویندا پئے اتے انہاں دی شاعری وسیب دے واسیاں دی حیاتی دی تصویر چھکی ہوئی اے ۔ شاکر شجاع آبادی کوں اعزازی ڈگری ملݨ تے وسیب توں علاوہ پورے ملک اچ خوشی منائی ویندی پئی اے۔
