واشنگٹن۔16نومبر(اے پی پی) امریکا اچ پاکستان دے سفیر مسعود خان امریکی تعلیمی اداریں اچ تعلیم حاصل کرݨ آلے پاکستانی طلبہ دی تعداد اچ ودھارے کوں خوش آئند قرار ݙیندے ہوئیں امید ظاہر کیتی اے جو ݙوہیں ملکاں وچال تعاون ودھاوݨ کیتے جاری کوششاں دے تحت موجودہ تعداد کوں آندے ترائے سالاں اچ ݙوگنا کرݙتا ویسی ۔ پاکستانی سفارتخانے توں جاری بیان موجب مسعود خان آکھیے مختلف امریکی تعلیمی اداریں اچ پاکستانی طلبہ دی ودھدی تعداد نہ صرف تعلیمی شعبے اچ نیڑے تعاون دی عکاسی کریندی اے بلکہ مستقبل اچ تکڑے ݙوطرفہ تعلقات دی ضمانت وی اے۔انہاں آکھیے پاکستانی طلبہ کوں سائنس،ٹیکنالوجی، انجینئرنگ اتے ریاضی (ایس ٹی ای ایم) دے مضمون اچ ودھ توں ودھ موقع ݙیوݨ تے توجہ ݙتی ڳئی اے تاں جو او انہاں مضمون اچ امریکی مہارت اتے علم توں فیدہ چا سڳن ۔امریکی محکمہ خارجہ اتے انسٹی ٹیوٹ آف انٹرنیشنل ایجوکیشن(آئی آئی ای) دی طرفوں امریکا اچ تعلیم گھنݨ آلے بین الاقوامی طلبہ دے اعداد و شمار دے حوالے نال سالانہ’’اوپن ڈورز رپورٹ ‘‘جاری کرݙتی ڳئی اے ۔ رپورٹ موجب امریکا اچ تعلیم گھنݨ آلے پاکستانی طلبہ دی تعداد 23۔2022 اچ 16 فیصد ودھ تے 10ہزار 164 تئیں پڄ ڳئی اے ، اے گزریل سال 8ہزار 772 ہئی ۔
