جنیوا ۔20نومبر (اے پی پی):عالمی ادارہ صحت دے ڈائریکٹر جنرل ٹیڈروس ادانوم گیبریسیوس آکھیے جو غزہ اچ الشفا ہسپتال مریضاں دی ݙیکھ بھال دے قابل نی رہیا ، ایکس تے جاری پوسٹ اچ انہاں آکھیے جو غزہ اچ شفا ہسپتال ہݨ مزید خدمات نی ݙے سڳدا جیڑھا جو اسرائیلی ناکہ بندی اتے حملے دی زد وچ اے ۔ انہاں ݙسائے جو پاݨی، خوراک اتے ایندھن کائنی، طبی سامان مک چکیے۔ انہاں ݙسائے جو ٻالاں سودھے مریضاں دی ابتر حالت کوں ݙیکھدے ہوئیں ، طبی کارکناں ایجھے مریضاں کوں انخلا سانڳے تعاون دی درخواست کیتی اے جو ہݨ اتھاں زندگی بچاوݨ دے قابل کائنی ۔ انہاں آکھیے اساں آپݨے شراکت داراں نال وختی طور تے انخلاء دا منصوبہ تیار کرݨ کیتے کم کریندے پیوں تے مطالبہ کریندوں جو ایں منصوبے کوں مکمل طور تے سہولت ݙتی ونڄے ۔ اساں صحت اتے شہریاں دے تحفظ کیتے آپݨے مطالبے دا اعادہ کریندوں ۔ موجودہ صورتحال ناقابل برداشت اے۔حالی جنگ بندی کیتی ونڄے ۔شفا ہسپتال اچ داخل تھیوݨ آلی ٹیم دیان سرگرمیاں دے حوالے نال بیان اچ ادارہ صحت آکھیے سکیورٹی دی صورتحال دی وجہ توں وقت دی کمی پاروں ٹیم ہسپتال اچ صرف ھک گھنٹہ گزار سڳی جتھاں بمباری اتے تصادم دے نشان صاف ݙکھائی ݙیندے پئے ہن ٹیم ݙسائے جو ہسپتال دے دروازے تے ھک اجتماعی قبر ݙٹھی تے آکھیے اتھاں 80 توں ودھ لوک دفن ہن عالمی ا دارہ صحت ݙسائے جو ایں ویلھے ہسپتال اچ 291 مریض اتے 25 طبی کارکن ہن، جنھاں اچ 32 ٻالاں دی حالت تشویشناک اے۔
