تل ابیب۔22نومبر (اے پی پی) اسرائیل اتے حماس وچال چار ݙینھ کیتے جنگ بندی اتے قیدیاں دے تبادلے دا معاہدہ تھی ڳئیا۔ روسی اخبار رشیا ٹوڈے دی رپورٹ موجب اسرائیلی کابینہ ایں معاہدے دی منظوری ݙے ݙتی اے اتے اسرائیلی مسلح فوج، خفیہ اداریاں موساد اتے شین بیت وی ایندی حمایت کیتی اے۔ معاہدے موجب چار ݙینھ دی جنگ بندی اچ حماس ولوں یرغمال ٻݨائے ڳئے اسرائیلی فوجیاں اتے شہریاں اچوں 50 دے نیڑے بندے چھوڑیے ویسن اتے حماس ولوں ٻئے اسرائیلیاں دی رہائی دی صورت جنگ بندی ودھائی ویسی۔ معاہدے موجب حماس ولوں ہر ݙاہ اسرائیلیاں دی رہائی دی صورت جنگ اچ ہک ݙینھ ودھایا ویسی۔ روسی اخبار اسرائیلی ذرائع ابلاغ دی رپورٹ بارے ݙسیا جو اسرائیلی حکومت فوری طور حماس نال تبادلے دے تحت چھوڑیے ڳئے ݙیݙھ سو فلسطینی قیدیاں دی فہرست جاری کریسی۔
