ملتان ۔28 نومبر(اے پی پی) کمشنرملتان ڈویژن انجینئرعامرخٹک آکھیے جو الیکشن کمیشن دی طرفوں دربار حضرت شاہ شمس اتے دربارحضرت موسی پاک شہیددی تزئین و آرائش دی اجازت ݙتی ڳئی اے ۔ایں توں انج ٻیاں ترقیاتی سکیماں دی تعمیر دی اجازت کیتے وی حکومت پنجاب اتے الیکشن کمیشن کوں لکھ ݙتا ڳئے ۔ اے ڳالھ انہاں ترقیاتی منصوبیں دا جائزہ گھنݨ سانڳے منعقدہ اجلاس دی صدارت کریندے ہوئیں آکھی اے ۔ کمشنر انجینئر عامر خٹک سکیماں تے کم دی رفتار تکھی کرݨ سودھے ساریاں سکیماں دی مقررہ مدت اچ مکمل کرݨ دی ہدایت کیتی ۔ کمشنرملتان مزید آکھیے 394 ملین روپے دی لاگت نال دربارحضرت شاہ شمس دی تزئین وآرائش دا کم جاری اے جݙاں جو 35 ملین روپے دی لاگت نال دربارحضرت موسی پاک شہیددی اپ گریڈیشن کیتی ویندی پئی اے ۔ بعداچ کمشنرملتان چک آر ایس شجاع آباد فلائی اوور دی تعمیر کوں وختی مکمل کرݨ دی ہدایت کریندے ہوئیں آکھیے ریلوے پھاٹک دی وجہ توں ٹریفک جام رہݨ معمول ہئی ۔عوامی شکایتاں دے ازالے سانڳے فلائی اوور سائٹ تے کم دی رفتار ودھائی ونڄے ۔ایکسین ہائی ویز غلام نبی کمشنرملتان کوں بریفنگ اچ ݙسائے ھک ارب روپے دی لاڳت نال فلائی اوور دی تعمیر جاری اے اتے اےمنصوبہ 31جنوری2024تئیں مکمل کر ڳھدا ویسی ۔ انہاں ݙسائے ہݨ تئیں فلائی اوور دے 87 پائلزاتے 53 گنڈرز مکمل کر ڳھدے ڳئن۔
