اسلام آباد۔3دسمبر (اے پی پی) الیکشن کمیشن آف پاکستان (ای سی پی) حلقہ بندیاں دی چھیکڑی فہرست دے آپݨے اڄوکے نوٹیفکیشن اچ قومی اسمبلی (این اے) دی نشستاں دی تعداد 336 کرݙتی اے۔ قومی اسمبلی دی 6 جنرل نشستاں ڳھٹ تھی ڳئن۔ ایں توں پہلے قومی اسمبلی دی نشستاں دی تعداد 342 ہئی۔ الیکشن کمیشن آف پاکستان (ای سی پی) توں جاری حلقہ بندیاں دی فہرست اچ قومی اسمبلی دی جنرل نشستاں دی تعداد 272 توں ڳھٹ تھی تے 266 رہ ڳئی اے۔ حد بندی دے عمل دے بعد، انضمام تھیے ضلعیاں کیتے قومی اسمبلی دی نشستاں گزریل 12 توں ڳھٹ کر تے چھی کر ݙتی ڳئن۔ اے ایڈجسٹمنٹ 25ویں آئینی ترمیم دی دفعات دے مطابق اے، جئیں دے بعد وفاق ولوں قبائلی علاقہ جات (فاٹا) دے خیبرپختونخوا اچ ضم تھی ڳئن۔قومی اسمبلی اچ پنجاب دی 141 جنرل نشستاں ہوسن، سندھ دی 61، خیبرپختونخوا دی 45، بلوچستان دی 16 اتے اسلام آباد دی ترائے نشستاں ہوسن۔ تریمتیں کیتے سٹھ مخصوص نشستاں ہوسن جڈانجو اقلیتاں کیتے ݙاہ ہوسن۔ پنجاب اسمبلی اچ 371 نشستاں ہوسن جئیں اچوں 297 جنرل نشستاں ہوسن۔ سندھ اچ 168 نشستاں جئیں اچوں130 جنرل نشستاں ہوسن۔ خیبرپختونخوا اسمبلی دی 145 نشستاں ہوسن جئیں اچوں 115 جنرل ہوسن۔ بلوچستان اسمبلی دی 65 نشستاں ہوسن جئیں اچوں 51 جنرل ہوسن۔
