دوبئی۔3دسمبر (اے پی پی) نگراں وزیر اعظم انوار الحق کاکڑ آکھیا جو پاکستان کوں موسمیاتی تبدیلیاں دے مطابق ڈھالݨ کیتے سندھ طاس کوں ماحولیات نال جوڑݨ ٻہوں ضروری اے کیونجو آبادی دی اکثریت دریا نال جڑی اے، پاکستان دی مستقبل دی لوڑھ کیتے پاݨٰی دی دستیابی ہک وݙا چیلنج اے، لیونگ انڈس انشیٹو دے تحت اساں مستقبل کوں محفوظ ٻݨا سڳدوں۔ آݙت وار کوں اقوام متحدہ دی 28ویں کانفرنس آف پارٹی(کوپ) دےپاکستان پویلین اچ تھیوݨ آلے لیونگ انڈس انیشی ایٹو’ دے موضوع تے تقریب توں خطاب کریندیں ہوئیں انہاں آکھیا جو پاکستان موسمیاتی تبدیلیاں توں متاثر تھیوݨ آلا دنیا دا اٹھواں ملک اے۔ انہاں آکھیا جو لیونگ انڈس ہک وݙا کم اے جئیں دا مقصد پاکستان دی حدود اچ سندھ دے ماحولیات کوں بحال کرݨ اے جیڑھا جو موسمیاتی تبدیلیاں توں ساریاں توں ودھ خطرے اچ اے۔ انہاں آکھیا جو تجویز کیتا ڳئے جو اساکوں آندے پندراں لیں اچ 11 توں 17 ارب ڈالر دی سرمایہ کاری دی لوڑھ اے تانجو پبلک سیکٹر، پرائیویٹ سیکٹر، شہریاں اتے کمیونٹیز کوں متحرک کیتا ونڄ سڳے۔ انہاں آکھیا جو پاکستان ‘ریچارج پاکستان’ شروع کیتے جیڑھا جو لیونگ انڈس آلے پاسے چنڳا قدم اے۔ انہاں آکھیا جو تقریباً 78 ملین ڈالر دی بین الاقوامی موسمیاتی فنانسنگ نال اے فلیگ شپ پراجیکٹ مستقبل اچ چھل اتے خشک سالی دے اثرات کوں ڳھٹ کرݨ کیتے اساݙی کوششاں اچ مرکزی حیثیت رکھیندے۔
