اسلام آباد۔4 دسمبر(اے پی پی سرائیکی نیوز سروس ۔ ڈاکٹر سعدیہ کمال)اردو فورم ، ادارہ فروغ قومی زبان، قومی ورثہ و ثقافت ڈویژن ولوں اردو سرائیکی اتے پنجابی زبان دے جگ مشہور صوفی شاعر ادیب سجادہ نشین آستانہ عالیہ گڑھی اختیار خان خواجہ غلام قطب الدین فریدی نال ھک شاعری نشست رکھی ڳئی۔ شعری نشست دے تعارفی کلمات ڈاکٹر راشد حمید ادا کیتے۔ پروفیسر سعید احمد سعیدی، مشہور ادیبہ قیصرہ علوی، صاحبزادہ قمر الحق، ڈاکٹر فاروق عادل مقالہ جات پیش کیتے۔ خواجہ غلام قطب الدین فریدی اپݨے شعری مجموعے” بیتابی” توں چوݨواں کلام پیش کیتا۔ انہاں دا زیادہ پڑھیا ڳیا کلام تصوف تے ہئی۔ انہاں دی ݙوڄھی کتاب “دست طلب” وی آچکی اے جیندے اچ حمد تے نعتیہ کلام موجود اے ۔ انہاں دا آکھݨ ہا جو نعت حضرت محمد مصطفی صلی اللّٰہ علیہ وآلہ وسلم نال جڑت دا ھک ٻہوں وݙا اظہار اے اتے تصوف دے شوق آداب شناسی دی حدود اچ رہݨ دا سلیقہ بخشیے۔ انہاں اردو سرائیکی فارسی پنجابی کلام سݨایا۔ تقریب دے اخیر اچ سلطان باہو دے سجادہ نشین صاحبزادہ سلطان احمد دے نال نال ڈائریکٹر جنرل ادارہ فروغ قومی زبان پروفیسر ڈاکٹر محمد سلیم مظہر شکریہ ادا کریندے آکھیا جو خواجہ غلام قطب الدین فریدی تے ایم فل دی سطح دا کم تھی چکیے، اتے پنجاب یونیورسٹی لاہور ولوں لکھاری ڈاکٹر شفیق احمد اتے میں شعری مجموعے ” دست طلب” دی کتاب چھاپی اے۔ تقریب اچ اکبر خان نیازی میزبانی دے فرائض انجام ݙتے۔
