اقوام متحدہ ۔5دسمبر(اے پی پی) اقوام متحدہ دی جنرل اسمبلی تخفیف اسلحہ تے علاقائی و بین الاقوامی سطح تے امن تے سلامتی ودھاوݨ سانڳے پاکستان ولوں پیش کیتیاں ڳیاں 4قرارداداں دی منظوری ݙے ݙتی۔اے قرارداداں مذکورہ بالا مقصد سانڳے پاکستان دے واضح عزم دی عکاسی کریندن ۔ انہاں قرار داداں دے مسودیں دی193 رکنی جنرل اسمبلی دی فرسٹ کمیٹی (تحفیف اسلحہ و بین الاقوامی سلامتی ) دی طرفوں باری اکثریت نال منظوری ݙتی ڳئی ۔انہاں اچوں ترائے قرارداداں علاقائی تخفیف اسلحہ، علاقائی اتے ذیلی علاقائی سطح تے روایتی ہتھیاراں دے کنٹرول دے نال علاقائی اتے ذیلی علاقائی تناظر اچ اعتماد سازی دے اقدامات متعلق ہن۔چوتھی قرارداد اچ جوہری ہتھیار نہ رکھݨ آلی ریاستاں کیتے بین الاقوامی سلامتی دا یقین ݙیواوݨ دا مطالبہ اے ۔علاقائی اتے ذیلی علاقائی تناظر اچ “علاقائی تخفیف اسلحہ اتے اعتماد سازی دے اقدامات” دے عنوان نال قرارداداں دی جنرل اسمبلی دی بغیر ووٹنگ دے متفقہ منظوری ݙتی جݙاں جو “علاقائی اتے ذیلی علاقائی سطح تے روایتی ہتھیاراں دے کنٹرول” متعلق قرارداد دی حمایت اچ 186 رکن ملکاں ووٹ ݙتے جݙاں جو صرف ھک ملک بھارت قرار داد دی حمایت توں انکار کیتا ۔ایں قرار داد دے حق اچ 123 رکن ملکاں ووٹ ݙتے جݙاں جو 62 ملکاں رائے شماری اچ حصہ نی ڳھدا ۔جنرل اسمبلی اپݨی شرطاں موجب جوہری ہتھیاراں دے استعمال یا استعمال دے خطرے دے خلاف غیر جوہری ہتھیار رکھݨ آلی ریاستاں کوں جوہری ہتھیاراں دے استعمال یا استعمال دی تڑی دے خلاف تحفظ دا یقین ݙیواوݨ سانڳے موثر انتظامات تے وختی معاہدے تئیں پڄݨ دی وختی لوڑھ دی توثیق کیتی۔
