اسلام آباد۔8دسمبر(اے پی پی سرائیکی نیوز سروس، ڈاکٹر سعدیہ کمال) قومی کمیشن برائے وقار نسواں دی چیئرپرسن نیلوفر بختیار آکھیے تریمتاں تے تشدد روکݨ تے نکی عمر دی شادی دے معاملے تے آگاہی ݙیوݨ دیاں کوششاں اچ میڈیا دا اہم کردار اے،نکی عمر دی شادی دے سخت سماجی ومعاشی اثرات پُوندن ۔ انہاں اے ڳالھ خمیس کوں سینٹر فار ایکسیلنس ان جرنلزم اتے یو این ایف پی اے دی سانجھ نال ݙوجھے نیشنل میڈیا فیلوشپ (این ایم ایف) دے ݙینھ وار (7-10 دسمبر) ریفریشر کورس دی افتتاحی تقریب توں خطاب کریندے ہوئیں آکھی اے ۔کورس دا آغاز نیشنل کمیشن وقار نسواں (این سی ایس ڈبلیو)، انسٹی ٹیوٹ آف بزنس ایڈمنسٹریشن (سی ای جے ،آئی بی اے) اسلام آباد اچ تھیا ۔جاری پریس ریلیز موجب این ایم ایف ٹریننگ دا ھک منفرد پروگرام اے جئیں دا مقصد صنفی تشدد (جی بی وی) اتے نکی عمر دی شادی جیہے سماجی مسئلیں تے توجہ ݙیواوݨ تے ایندے متعلق صحافیاں اچ شعور اجاگر کرݨا اے۔ریفریشر دے پہلے ݙینھ این سی ایس ڈبلیو اچ تھیو آلے تعارفی سیشن توں خطاب کریندے ہوئیں نیلوفر بختیار آکھیے انہاں مسئلیں تے رپورٹنگ یا تحریر کریندے ہوئیں صحافیاں تے اہم ذمہ واری لڳدی اے کیوں ٻہوں سارے رسک فیکٹر ساݙے معاشرے اچ خاص طور تے تشدد یا زیادتی دا شکار فرد دی حفاظت، ایندی شناخت، عزت نفس اتے سماجی حیثیت کوں سامݨے رکھݨ ضروری ہوندے ۔ انہاں آکھیے اے تربیتی پروگرام انہاں دے دل دے ٻہوں نیڑے ہے کیوں جو انہاں پاکستان اچ تریمتاں تے چھوہریں سانڳے صنفی مساوات اتے مساوی حقوق گھنݨ سانڳے اینکوں سدھے پاسے ھک وختی قدم تصور کیتے۔انہاں مزید آکھیے جو پاکستان اچ خاص طور تے دیہاتی علاقیں اچ نکی عمر دی شادی جھکیاں پاڑاں رکھݨ آلا ٻہوں وݙا مسئلہ اے جیڑھا جو ھک محفوظ تے صحت مند بچپن، معیاری تعلیم تے ٻال دا حق کھسیندے ایندے سخت معاشی اثرات وی پُوندن۔ انہاں مزید آکھیے انہاں دی ٹیم جی بی وی مکاوݨ سانڳے ہر طرح نال کم کریندی پئی اے لیکن میڈیا دی فعال شرکت اتے تعاون دے بغیر ایجھا نی تھی سڳدا ۔این سی ایس ڈبلیو پہلی واری آپݨے معاونین اداریں دے رلے 2022 اچ صحافیاں کوں حساس بݨاوݨ تے تربیت ݙیوݨ سانڳے میڈیا فیلوشپ دا آغاز کیتا ہئی تاں جو صنفی مسئلیں کوں ایں زاویے توں میڈیا اچ رپورٹ کیتا ونڄ سڳے۔ این ایم ایف دے پہلے دور اچ 37 صحافیاں کوں ایں مخصوص موضوع تے تربیت ݙتی ڳئی انہاں جی بی وی متعلق 2 دستاویزی فلماں، نکی عمر دی شادی تے تریمتاں تے ماحولیاتی تبدیلیاں دے اثرات تے 162 کہانیاں تیار کیتیاں جیڑھیاں جو پورے ملک دے معروف میڈیا ہاؤسز توں چھپیاں تے نشروی تھیاں۔میڈیا فیلوشپ دے ݙوجھے دور اچ پاکستان توں آوݨ آلے 40 مڈ کیرئیر صحافیاں دا ھک گروپ خصوصی تربیت گھنسی ۔ جئیں دی تکمیل دے بعد اے گروپ جی بی وی، چھوہریں تے تریمتاں دے حقوق تے توجہ ݙیوݨ آلی 180 توں ودھ کہانیاں تیار کریسی
