اقوام متحدہ۔13دسمبر (اے پی پی) اقوام متحدہ دی جنرل اسمبلی غزہ اچ جنگ بندی دے مطالبے تے مبنی قرار داد 153 ووٹاں دی وݙی اکثریت نال منظور کر ڳھدی اے۔ انڈیپنڈنٹ اردو موجب غزہ اچ انسانی بنیاداں تے جنگ بندی دے مطالبے تےمبنی قرار داد تے گزریل ݙینھ اقوام متحدہ دی جنرل اسمبلی اچ ووٹنگ تھئی جئیں اچ عالمی ادارے دے 193 اچوں 153 ملکاں قرارداد دے حق اچ ووٹ ݙتے۔ امریکا اتے اسرائیل سودھے ݙاہ ملکاں ایں قرارداددے خلاف ووٹ ݙتے جڈانجو برطانیہ، جرمنی اٹلی ، نیدر لینڈز اتے یوکرین سودھے 23 ملکاں ووٹنگ اچ حصہ نی ڳھدا۔ اقوام متحدہ دی جنرل اسمبلی اچ غزہ اچ جنگ بندی دے مطالبے دی ایں قرارداد تے ووٹنگ عالمی امن تے سلامتی دے ذمہ دار ادارے سلامتی کونسل دی ایں معاملے تے ولا ولا ناکامی دے بعد تھئی اے۔ اقوام متحدہ اچ مصر دے سفیر اسامہ محمود عبدالخالق محمود جنرل اسمبلی اچ ووٹنگ توں پہلے اسرائیل کوں سفارتی تحفظ ݙیوݨ دی امریکی کوششاں تے افسوس کریندیں ہوئیں آکھیا جو اے کوششاں دہرے معیار دی گھناؤنی علامت ہن۔ اقوام متحدہ دے سیکرٹری جنرل انتونیو گوتریش غزہ اچ امن عامہ دی تباہی بارے خبردار کیتے۔ اقوام متحدہ اچ فلسطین دے سفیر ریاض منصور آکھیا جو اے غزہ اچ انسانی بنیاداں تے جنگ بندی دے حق اچ ووٹ جنرل اسمبلی توں ٻھیجے ڳئے طاقت وار سنیھے دے لحاظ نال ہک تاریخی ݙینھ اے۔
