سرینگر۔15دسمبر (اے پی پی) بھارت دے غیر قانونی قبضے اچ جموں تے کشمیر اچ کل جماعتی حریت کانفرنس آکھیا جو کشمیر اقوام متحدہ دے ایجنڈے تے موجو ساریاں توں پراݨے تنازعیاں اچوں ہک اے جئیں دا اڄاں تئیں حل نہ تھیوݨ وݙے پیمانے تے انسانی ڄاناں دا ضیان دا باعث اے۔ کل جماعتی حریت کشمیریوں نال بھرپوراظہار یکجہتی اتے آزاد کشمیر قانون ساز اسمبلی دے اجلاس نال خطاب اچ کشمیریاں دے جذبات دی ترجمانی کرݨ تے نگران وزیر اعظم پاکستان دا شکریہ ادا کیتا۔ کشمیر میڈ یا سروس موجب کل جماعتی حریت کانفرنس دے ترجمان سرینگر اچ جاری ہک بیان اچ آکھیا جو کشمیری اقوام متحدہ ولوں منیے ڳئے حق ، حق خودارادیت کیتے گزریل ست ڈھاکیاں توں قربانیاں ݙیندے پئن۔ انہاں آکھیا جو بھارت کشمیریاں دے جذبہ آزادی کوں دباوݨ اتے جموں تے کشمیر تے آپݨا غیر قانونی قبضہ برقرار رکھݨ کیتے سارے وحشیانہ ہتھکنڈے استعمال کریندا پئے۔ ترجمان آکھیا جو نریندر مودی دی قیادت اچ بھارتیہ جنتا پارٹی دی ہندو توا بھارتی حکومت مقبوضہ علاقے اچ ریاستی دہشت گردی دی ساری حداں پار کر ݙتن۔ کل جماعتی حریت کانفرنس آزادجموں تے کشمیر شاخ وی اسلام آباد اچ جاری ہک بیان اچ نگران وزیر اعظم پاکستان انوارالحق کاکڑ دا شکریہ ادا کیتا۔
