غزہ۔18دسمبر (اے پی پی) اقوام متحدہ دے ادارہ برائے صحت (ڈبلیو ایچ او ) آکھیا جو شمالی غزہ دے الشفا ہسپتال اچ طبی سامان پڄاوݨ آلے ایمرجنسی ڈیپارٹمنٹ اچ ہر پاسے خون اے جتھ سینکڑاں لوکاں زخمی حالت اچ موجود ہن جڈانجو نویں زخمی وی مسلسل امدے پئن۔ ڈبلیو ایچ او توں جاری بیان موجب ہسپتال اچ زخمی مریضاں کیتے کوئی مناسب سہولت کائنی اتے انہاں کوں فرش تے طبی خدمات ݙتی ویندی پئی اے۔ ایمرجنسی ڈیپارٹمنٹ اچ فرش تے اتنے زخمی ہن جو عملے دے لنگھݨ دا راہ کائنی۔ انہاں آکھیا جو الشفا ہسپتال جیڑھا جو ہلے غزہ دا ساریاں توں اہم اتے وݙا ریفرل ہسپتال ہئی ہݨ اوکھ اچ کم کریندا پئے۔ ایندھن، آکسیجن، خصوصی طبی عملے اتے سامان دی ڳھٹکی پاروں آپریٹنگ تھیٹر اتے ٻئی اہم خدمات دستیاب کائنی۔ ورلڈ ہیلتھ آرگنائزیشن آکھیا جو ہسپتال صرف بنیادی طبی سہولتاں ݙیوݨ دے قابل اے۔ اتھ زخمیاں کیتے خون تئیں دستیاب کائنی۔ مٹھی بھر ڈاکٹر ، نرساں اتے تقریباً 70 رضاکار اوندے تحت کم کریندے پئن۔ ڈبلیو ایچ او آکھیا جو او آندے ہفتے اچ الشفا ہسپتال کوں مضبوط ٻݨاوݨ کیتے پرعزم اے۔
