ڈیرہ غازی خان۔ 03 جنوری (اے پی پی) شمالی وزیرستان دے علاقہ مسکی میر علی اچ نامعلوم دہشت گرداں ڈیرہ غازی خان توں تعلق رکھݨ آلے چھی مزدوراں کوں شمالی وزیرستان اچ شہید کر ݙتا ڳئے۔ تفصیل موجب ڈیرہ غازی خان دے علاقہ چھابری زیریں اتے پیر عادل دے چھی نینگراں کوں گزریل ݙینھ منگل کوں شہید کر ݙتا ڳئے۔ راہب علی،عرفان،سجاد،طارق، شاہد اتے کاشف وزیرستان دے علاقہ میر علی اچ حجام دا کم کریندے ہن اتے نامعلوم دہشت گرداں ولوں فائرنگ کر تے شہید کر ݙتا ڳئے۔ ایں بارے کمشنر ڈی جی خان ڈویژن ڈاکٹر ناصر محمود بشیر متعلقہ اداریاں کوں ہائی الرٹ کرݙتے اتے شہیداں دے جسد خاکی ریسکیو 1122 دی ایمبولینس تے صوبائی سرحدی چیک پوسٹ ترنمن توں آبائی علاقے چھابری زیریں اتے پیر عادل ڳھدی آئی ویندی پئن۔ نماز جنازہ دے بعد سرکاری خرچے تے تدفین کرائی ویسی۔ کمشنر ڈیرہ غازی خان ݙسیا جو مخیر حضرات اگر متاثرہ ٹٻراں دی مالی امداد کرݨ چاہندن تاں او ڈپٹی کمشنر ڈی جی خان نال رابطہ کرسڳدن اتے متاثرہ ٹبراں دی مالی امداد کیتے حکومت پنجاب کوں وی سفارشات ٻھیج ݙتی ڳئن۔
