کابینہ دی اقتصادی رابطہ کمیٹی دا اجلاس، آئی بی کیتے 25 کروڑ روپے دی تکنیکی ضمنی گرانٹ منظور

اسلام آباد۔9جنوری(اے پی پی)کابینہ دی اقتصادی رابطہ کمیٹی (ای سی سی) دا اجلاس اسلام آباد اچ نگران وفاقی وزیر خزانہ، محصولات و اقتصادی امور ڈاکٹر شمشاد اختر دی اڳواݨی اچ تھئے ڄئیں انٹیلی جنس بیورو کیتے 25 کروڑ روپے دی تکنیکی ضمنی گرانٹ دی منظور ݙتی۔ اجلاس اچ وزیرنجکاری فوادحسن فواد، وزیرمنصوبہ بندی محمد سمیع سعید، ڈپٹی چیئرمین منصوبہ بندی کمیشن ڈاکٹرمحمدجہانزیب خان، وزیر قانون احمد عرفان اسلم، وزیراعظم دے مشیرخزانہ ڈاکٹروقارمسعود، وفاقی سیکرٹریز اتے متعلقہ وزارتاں دے سینئر افسران شرکت کیتی۔ اجلاس اچ جاری مالی سال اچ انٹیلی جنس بیورو  کیتے 25کروڑ روپے دے اضافی فنڈز دی سمری پیش کیتی ڳئی جو ادارے کوں دہشتگردی واقعات نال نٻڑݨ کیتے موثر جوابی اقدامات، اپ گریڈیشن، تکنیکی بہتری اتے بیورو دیاں سرگرمیاں کیتے تکنیکی ضمنی گرانٹ دی لوڑھ اے۔ اجلاس اے مطالبہ من ڳھدے اتے 25 کروڑ روپے دی تکنیکی ضمنی گرانٹ منظور کیتی۔ اجلاس وزارت صنعت و پیداوار ولوں مقامی ٻݨی یوریا اتے درآمدی یوریا دی باسکٹ پرائس تے ویچݨ دے طریقہ کار دی سمری پیش کیتی ڳئی، ای سی سی ویٹڈ اوسط قیمت دی منظوری ݙیندے نیشنل فرٹیلائزرمینوفیکچرنگ لمیٹڈ کمپنی کوں قیمتاں مناسب رکھݨ دی ہدایت کیتی۔ ای سی سی فیڈرل ڈائریکٹوریٹ آف امیونائزیشن کیتے 3568.56 ملین روپے دی تکنیکی ضمنی گرانٹ، سبسڈی گرانٹ ایگریمنٹ (ایس جی اے) دے ضمیمہ تے دستخط بارے وزارت خزانہ دی سمری دی وی منظوری سودھا وزارت بین الصوبائی رابطہ دی سمری تے 100 ملین روپے دی تکنیکی ضمنی گرانٹ منظور کیتی۔