اڄ صورتحال پہلے تون بہوں چنڳی اے، انتخابات 8 فروری کوں تھیسن، نگران وفاقی وزیر اطلاعات دا الیکشن کمیشن دا دورہ

اسلام آباد۔10جنوری(اے پی پی)نگران وفاقی وزیر اطلاعات، نشریات و پارلیمانی امور مرتضیٰ سولنگی آکھیے جو پاکستان اچ خراب ترین حالات اچ وی الیکشن تھئین، اڄ صورتحال 2008 اتے 2013 توں بہوں چنڳی اے، انتخابات 8 فروری 2024 کوں تھیسن۔ الیکشن کمیشن آف پاکستان اچ میڈیا نال الیندے نگران وفاقی وزیر اطلاعات آکھیا جو نگران کابینہ دے پہلے اجلاس دے بعد توں مسلسل الیکشن کمیشن نال رابطے اچ ہیں، روز رابطہ تھیندے، الیکشن کمیشن آوݨ معمول دی ڳالھ اے، میݙی چیف الیکشن کمشنر نال کوئی ملاقات نئیں تھئی، کوشش اے جو سیکورٹی صورتحال ٻئی بہتر کروں، انتخابات دی کوریج کیتے فارن میڈیا بارے معلومات وزارت خارجہ اتے الیکشن کمیشن آف پاکستان ݙیسن۔ انہاں آکھیا جو سیاسی جماعتاں دے امیدواراں دے اعلان دے بعد انتخابی سرگرمیاں دا باقاعدہ آغاز تھی ویسی، ساریاں سیاسی جماعتاں انتخابی سرگرمیاں شروع وی کر ݙتن، ہݨ ایندے اچ ٻئی تیزی آسی۔ نگران وزیر آکھیا جو پہلے وی سوشل میڈیا پلیٹ فارمز اچ تکنیکی خرابی آندی رہی اے، ہݨ وی انٹرنیٹ دی خرابی پاروں کڄھ تکنیکی مسئلہ آئے جیندا سیاست نال کوئی تعلق نئیں، ایندیاں تفصیلات پی ٹی اے توں ڳھدیاں ونڄ سڳدن۔