الیکشن کمیشن دی مالی، انتظامی تے سکیورٹی ضرورتاں پوریاں کرݨ دے آئینی طور تے پابند ہیسے، نگران وفاقی وزیر اطلاعات مرتضیٰ سولنگی دی الیکشن کمیشن دے ٻاہروں میڈیا نال ڳالھ مہاڑ

اسلام آباد۔11جنوری(اے پی پی):نگران وفاقی وزیر اطلاعات، نشریات و پارلیمانی امور مرتضیٰ سولنگی آکھیے جو الیکشن کمیشن آف پاکستان دی مالی، انتظامی تے سکیورٹی ضرورتاں پوریاں کرݨ دے آئینی طور تے پابند ہیسے۔ الیکشن کمیشن دے ٻاہروں میڈیا نال ڳالھ مہاڑ کریندے ہوئیں ھک سوال دے جواب اچ انہاں آکھیے پی ٹی آئی متعلق معاملات دا پی ٹی آئی ہی بہتر ݙسا سڳدی اے ۔ انہاں آکھیے پاکستان اچ آزادانہ، منصفانہ، غیر جانبدارانہ اتے شفاف انتخابات کراوݨ دی آئینی ذمہ واری الیکشن کمیشن آف پاکستان دی اے، نگران حکومت آئینی اتے قانونی حکومت اے، اساں الیکشن کمیشن نال کھڑوں ۔ انہاں آکھیے حکومت الیکشن کمیشن دی مالی، انتظامی اتے سکیورٹی ضرورتاں پوریاں کرݨ دے آئینی طور تے پابند اے۔ ھک سوال دے جواب اچ انہاں آکھیے سکیورٹی دے مسئلے حقیقی ہن، اساکوں انہاں دا پتہ ہے اینکوں بہتر کریسوں ، ھک ٻئے سوال تے انہاں آکھیے جو ملک اچ سوال چاوݨ تے کوئی پابندی کائنی ۔ انتخابات انشاءاللہ 8 فروری 2024ء خمیس کوں تھیسن ، 8 فروری کوں پولنگ اسٹیشنز دے ٻاہروں عوام دیاں قطاراں نظر آسن۔