اسلام آباد۔18جنوری (اے پی پی) امریکا دی پاکستان عراق اتے شام اچ ایرانی حملیاں دی مذمت کیتی اے۔ بی بی سی موجب امریکی محکمہ خارجہ دے ترجمان میتھیو ملر پریس بریفنگ اچ آکھیا جو اساں ایران ولوں انہاں حملیاں دی مذمت کریندوں۔ انہاں ٻیا آکھیا جو اساں گزریل کجھ ݙینھ اچ ایران کوں آپݨے ترائے ہمسائے ملکاں دی خودمختاری اتے سرحداں دی خلاف ورزی کریندیں ݙتھے۔ ہک سوال دے ولدے اچ انہاں آکھیا جو ایران دے قول و فعل اچ تضاد اے۔ ایران ہک پاسے خطے اچ دہشت گردی اتے عدم استحکام کیتے فنڈنگ کریندے اتے ݙوجھے پاسے او دہشت گردی دے خلاف کاروائی کرݨ دا دعویدار اے۔ ہک سوال دے ولدے اچ امریکی ترجمان امید کیتی جو پاکستان اتے ایران وچال ایں معاملے کوں پر امن طریقے نال حل کر ڳھدا ویسی۔
