ملتان۔ 18 جنوری (اے پی پی)سرائیکی تے اردو دے نامورگلوکار عارف خان بابرکوں خمیس دی شام ملتان اچ دفنا ݙتا ڳئے ۔ نماز جنازہ اچ ریڈیو پاکستان ملتان دے اسٹیشن ڈائریکٹر ریاض میلسی، سابق کنٹرولر و اسٹیشن ڈ ائریکٹر آصف خان کھیتران، ریڈیو پاکستان ملتان اتے ملتان آرٹس کونسل دے کارکناں،نامور گلوکاراں، موسیقاراں اتےزندگی دے وکھو وکھ شعبیں نال تعلق رکھݨ آلے لوکاں دی وݙی تعداد شرکت کیتی ۔ انہاں دا گزریل رات حرکت قلب بند تھیوݨ پاروں انتقال تھی ڳیا ہئی۔ عارف خان بابر لوک گیت،غزل، کلاسیکی اتے نیم کلاسیکی موسیقی اچ شہرت پاتی ۔ انہاں 1980ءدے عشرے اچ ریڈیو پاکستان ملتان توں فنی کیریئرداآٰغاز کیتا۔عارف خان بابر ملتان اچ فنکاراں دے حقوق سانڳے ھک تنظیم وی بنیاد وی رکھی۔ او نینگر گلوکاراں دی رہنمائی سانڳے اکیڈمی وی چلیندے ہن۔فن موسیقی توں تعلق رکھݨ آلی نامور شخصیات انہاں دی فوتکی تے ݙکھ تے افسوس کیتے ۔ جڳ مشہور گلوکارہ ثریا ملتانیکر اے پی پی نال ڳالھ کریندے ہوئیں آکھیے عارف خان بابر ھک سلجھی ہوئی آواز ہن ۔او پکے سُراں توں واقف ہن اے صرف ملتان دا نی پورے ملک دا ضیان اے ۔ سینئر براڈ کاسٹر آصف خان کھیتران آکھیے او موسیقی دی ساری اصناف اتے رموز توں واقف ہن۔ گیت، لوک گیت ،کافیاں ،راڳ راڳݨِیاں اچ انہاں کوں مہارت حاصل ہئی ۔
