واشنگٹن۔19جنوری (اے پی پی):امریکا آکھیے جو او پاکستان تے ایران وچال موجود صورتحال دی ٻہوں نیڑے توں مانیٹرنگ کریندا پئے تے ݙوہیں ملکاں تے زور ݙیندے جو او کشیدگی نہ ودھاون ۔ وائٹ ہاؤس دے قومی سلامتی دے مشیر جان کربی گزریل ݙینھ ایئر فورس ون اچ صدر جو بائیڈن نال سفر کرݨ آلے نامہ نگاراں نال ڳالھ مہاڑ کریندے ہوئیں آکھیے جو ݙوہیں ملکاں کنے وݙی تعداد اچ اسلحہ اے تے اساں انہاں وچال کشیدگی ودھݨ نی ݙیکھݨ چاہندے ۔ انہاں مزید آکھیے جو اساں واضح طور تے جنوبی اتے وسطی ایشیا اچ کشیدگی اچ ودھارا نی ݙیکھݨ چاہندے تے اساں آپݨے پاکستانی ہم منصباں نال رابطے اچ ہیسے ۔ ھک سوال دے جواب اچ انہاں آکھیے جو پاکستان اپݨی فوجی کارروائیاں تے خود ڳالھ کریسی تے او ایں بارے محتاط رہݨ چاہندن ۔ انہاں آکھیے جو انہاں کوں ایں بارے پتہ کائنی جو آیا امریکا کوں پاکستان دے جوابی حملے بارے کوئی پیشگی اطلاع ہئی۔ ایں توں انڄ امریکی محکمہ خارجہ دے ترجمان میتھیو ملر نیوز بریفنگ اچ آکھیے جو پاکستان اتے ایران وچال کشیدگی کوں کہیں صورت نی ودھݨا چاہیدا ۔ ھک سوال دے جواب اچ انہاں آکھیے پاکستان امریکا دا ھک وݙا نان نیٹو اتحادی ملک اے۔
