غزہ۔25جنوری (اے پی پی) اسرائیل غزہ دے شہر خان یونس دے مغرب اچ اقوام متحدہ دے سینٹر تے بمباری کیتی جئیں اچ 9فلسطینی شہید ، 75 زخمی تھی ڳئے۔ فرانسیسی خبر رساں ادارےاے ایف پی موجب غزہ اچ اقوام متحدہ دی ریلیف اینڈ ورکس ایجنسی برائے فلسطینی پناہ گزین(یو این آر ڈبلیو اے) دے سربراہ تھامس وائٹ آکھیا جو اسرائیلی فوج گزریل ݙینھ اقوام متحدہ دے ہک شیلٹر تے بمباری کیتی جتھ بے گھر فلسطینیاں پناہ ڳھدی ہوئی ہئی۔ یو این آر ڈبلیو اے دے سربراہ فیلپ لازارینی آکھیا جو اموات دی تعداد ودھ سڳدی اے۔ اردو نیوز موجب اقوام متحدہ دی ایجنسی (یو این آر ڈبلیو اے) دے کمشنر جنرل آکھیا جو خان یونس اچ ایجنسی دی پناہ گاہ کوں نشانہ ٻݨاوݨ آلے حملیاں اچ جنگ دے اصولاں دی ’’سنگین خلاف ورزی‘‘ کیتی ڳئی اے۔
