اسلام آباد۔3فروری (اے پی پی سرائیکی نیوز سروس: ڈاکٹر سعدیہ کمال) مہان ماہر لسانیات ، محقق ، مؤرخ ، نقاد سئیں اسلم رسول پوری دی قل خوانی رسول پور اچ تھئی ۔ بزم کیفی دے وفد جیندے وچ بزم دے صدر حبیب اللہ طارق ، سیکرٹری سلیم انسب ، ممبران جمیل احسن بھٹی ، ناصر ڈینہ ، سلیم رازش ، فاروق فارس شامل ہن شریک تھئے۔ بزم کیفی دی طرفوں اسلم رسول پوری دے مزار تے سرائیکی تحریک دے پرچم دی چادر چڑھائی ڳئی ۔ بزم دے صدر حبیب اللہ طارق مزار نوحہ پڑھیا ۔ ایں موقع تے رزاق شاہد ، رؤف خان لنڈ ، عنایت اللہ مشرقی ، طارق اسماعیل احمدانی ، سلیم انسب ، ملک نذیر ، ملک آفتاب ،رسول پوری دے پتر پروفیسر وقار اسلم آپݨی ڳالھ کریندے ہوئیں مرحوم دی ادبی خدمات دی تعریف کیتی ایں موقع تے رسول پور اچ ھک وݙی لائبریری دے قیام دی تجویزوی پیش کیتی ڳئی حاضرین ایں تجویز دا خیر مقدم کیتا تےآپݨے تعاون دا یقین ݙیوائے۔انھاں شاعری بہوں نکی عمر اچ شروع کیتی ۔سیاست آپدی طرف ایجھا چھکیا جو سکول ویندے ہوئیں اے این پی دے جلسے اچ حاضری ݙیندے ہن .سوجھوان رزاق شاہد اے پی پی نال ڳالھ کریندے ݙسایا جو اسلم رسول پوری آپدی مادری زبان سرائیکی دی ٻہوں خدمت کیتی اے۔انھاں نثر لکھی سیاست اچ کݙاہیں برنجو دے جلسے اچ تاں کݙاہیں جی ایم سید دی محفل اچ ہوون ہا سُر شناسی دا شوق وی ہا او آپدے ویلھے دے کلاسیک تے لوک گائیکاں دی محفل اچ انھاں ٻہوں کجھ سکھیا تے سکھایا۔ تاج لنگاہ آپدی پارٹی پاکستان سرائیکی پارٹی اچ شامل کیتا۔ نائب صدر تے ولا جنرل سیکرٹری منتخب تھئے۔اوندے بعد میجر اسحاق، قسور گردیزی مولانا بھاشانی، ولی خان، اجمل خٹک تے رسول بخش پلیجو جہیں وݙے ناواں نال سیاسی رابطیاں دا سلسلہ چل پیا۔انھاں سرائیکی زبان و ادب اچ افسانے ، ڈرامے لکھیے جیڑھے ریڈیو ملتان توں نشر وی تھئے۔ارسطو دی “بوطیقا” اتے ماؤ دی “فن و ادب دے مسائل” دا ترجمہ کیتا۔انھاں دی لائبریری دا وݙا حصہ سیکشن ، موسیقی ، مارکس ،فریدیات ، انگریزی زبان و ادب،یورپی فلسفہ تے آرٹ دا اے ۔انھاں دیاں کتاباں اچ 1، تلاوڑے2، نتارے3، لیکھے 4، سرائیکی ادب وچ معنی دا پندھ5، سرائیکی قاعدہ6، لسانی مضامین7، سرائیکی زبان اوندا رسم الخط تے آوازاں8، سچل سرمست9، بیدل سندھی10،حمل لغاری11، سرائیکی قومی سوال12، سرائیکی لوک موسیقی13، سرائیکی اسلوبیاتی تنقید14، سرائیکی زبان اتے لسانیات15، مارکسی نقطہ نظر تے ساݙا ادب تے ایں توں انڄ اخباراں تے رسالیاں اچ لکھیے ونڄݨ آلے تحقیقی مضمون شامل ان۔ سرائیکی تحقیق تے تنقید کیتے کݙاہیں مہرعبدالحق تے کݙاہیں دلشاد کلانچوی نال سرائیکی رسم الخط دے اصولاں تے بحث کریندے ہن۔
