اسلام آباد۔6فروری(اے پی پی، سرائیکی نیوز سروس ،ڈاکٹر سعدیہ کمال) ڈاکٹر ممتاز خان اسلامیہ یونی ورسٹی بہاول پوردے شعبہ سرائیکی دے چئیرمین بنڑ گئین ۔ڈاکٹرجاویدحسن چانڈیو دی ریٹائرمنٹ دے بعد ڈاکٹر ممتاز خان سرائیکی ڈیپارٹمنٹ اسلامیہ یونیورسٹی بہاول پور دے چئیرمین بنڑ گئین ۔ڈاکٹر ممتاز بلوچ 1972 اچ بہاول پور دے ہک مضافاتی وستی کھوہ ڄال والا موضع خان والی اچ ڄمئے ۔ پرائمری تعلیم آپݨی وستی دے سکول توں گھدی ، گورنمنٹ عباسی ہائی سکول بہاول پور توں 1987 اچ فرسٹ ڈویژن دے نال ڈاھویں دا امتحان پاس کیتا۔ 1989 اچ میں ایف ایس سی پری انجینئرنگ نال گورنمنٹ انٹر کالج بہاولپور توں کیتی۔ ایم اے سرائیکی 1999 اچ اسلامیہ یونیورسٹی بہاول پور توں کیتی تے گولڈ میڈلسٹ ہن ۔ اے پی پی سرائیکی نیوز سروس نال گالھ مہاڑ کریندے انھاں ڈسایا جو 2000 توں شعبہ سرائیکی اچ 2007 تئیں وزیٹنگ فیکلٹی دے طور تے پڑھایا تے ایں وچال 2000اچ سرائیکی پہلی واری گریجوایشن سطح تے متعارف کرائی ڳئی تاں انھاں کوں گورنمنٹ ایس ای کالج اچ اے اعزاز ملیا جو پہلے ٹیچر دے طور تے سرائیکی کلاساں پڑھایاں اتے پںج سال تئیں گورنمنٹ ایس ای کالج اچ کلاساں تنخواہ دے بغیر پڑھیندے رہ ڳئے ۔ 2007 اچ پہلی واری شعبہ سرائیکی اچ ہک لیکچرر دی آسامی تے 43 لوکیں اچوں سلیکشن تھئی 2008 اچ شعبہ پاکستانی زبانیں و ادب اچ اسلام آباد اچ ایم فل اچ داخلہ ڳھدا اتے 2010 اچ میں ایم فل مکمل کیتی اتے نال سروس وی چلدی رہ ڳئی۔انھاں دا بیا آکھنڑ ہا جو 2010 اچ ای میں پی ایچ ڈی سرائیکی کیتےعلامہ اقبال اوپن یونیورسٹی اچ داخلہ ڳھن ڳھدا کیونجو بئی کہیں ڄاہ تے ایں سہولت کائنا ہئی۔ 2016 اچ میں آپݨی پی ایچ ڈی مکمل کیتی اوندا موضوع ہئی” سرائیکی چھپیل منظوم قصیاں دا تنقیدی ویورا” ۔ میݙا ایم فل دا مقالہ وی فولک ٹریل تے ہئی جو سرائیکی اچ ہیر رانجھا دے قصیاں دا تقابلی جائزہ ۔۔ڈاکٹر ممتاز خان دیاں لکھتاں اچ 2007 اچ پہلی سرائیکی کتاب، ماڈرن شاعری تے تحقیقی ،تنقیدی مظامین ہن جیڑھی جو جھوک سرائیکی پبلشرز ملتان توں “جدید سرائیکی شاعری تے اڄوکا بندا” دے عنوان نال چھپی ۔ 2017 اچ میں لیکچرر توں اسسٹنٹ پروفیسر تعینات تھئے اتے 2022 اچ میں ایسوسی ایٹ پروفیسر دے طور تے جوائن کیتا۔ اتے ہنڑ فروری 2024 توں آپݨے استاد پروفیسر ڈاکٹر جاوید احسان چانڈیو دی مدت ملازمت پوری تھیوݨ تے سرائیکی شعبے چیئرمین دے طور تے کم کریسن ۔انھاں دیاں لکھت اچ 2023 اچ ݙوکتاباں چھپ تے آئن جئیں اچوں ہک”منظوم قدیم دینی ادب” فکشن ہاؤس چھاپی اے، اتے ݙوجھی کتاب “سرائیکی شاعری دے گُر” ہئی جیندے اچ ترمیم کرتے اینکوں ولا فکشن ہاؤس چھاپیے۔ ہݨ نویں کتاب جیڑھی جو چھپائی ” سرائیکی اچ ہیر رانجھا دے قصیاں دا تقابلی جائزہ” او عکس پبلیکیشنز لاہور آلے شائع کریندے پئن اتے امید اے جو آندے اٹھ توں ݙاہ ݙینھ اچ او منظر عام تے آویسی۔ جینویں میں ایم فل پورا کیتا تاں اساں آپݨے شعبے اچ ایم فل پروگرام شروع کرایاجیڑھا کامیابی نال چلدا پئے ۔ 2016 تے 2017 اچ ایچ ای سی توں این او سی ڳھن تے پی ایچ ڈی پروگرام شروع کرایا۔ انھاں ڈسائے جو اساݙے کول ایں ویلھے 40 دے نیڑے پی ایچ ڈی سکالرز مختلف مراحل اچ ریسرچ کریندے پئن اتے 12 توں 14 دے نیڑے پاس آؤٹ تھی چکین۔ پنج سکالرز ڈاکٹر ممتاز خان دی نگرانی ا چ پی ایچ ڈی کیتی اے اتے او مختلف کالجاں اچ پڑھیندے پئین ۔ انھاں آکھے جو میڈی خاہش اے جو میں آپݨی ملازمت دی مدھ اچ سرائیکی زبان تے ادب تے سرائیکی لوکیں دی سوھݨے طریقے نال خدمت کر سڳاں۔
