دبئی۔14فروری(اے پی پی):انٹرنیشنل کرکٹ کونسل (آئی سی سی) کھلاڑیاں دی تازہ ترین ون ڈے رینکنگ جاری کرݙتی اے جیندے مطابق پاکستان دے بلے باز بابر اعظم بدستور نمبر ون بلے باز اتے جنوبی افریقہ دے کیشو مہاراج بائولرز فہرست اچ اڳو ہین۔ پاکستان دے سٹار کرکٹر بابراعظم 824 رینکنگ پوائنٹس نال پہلی پوزیشن تے ہین۔ بھارتی کھلاڑی شبمن گل 801 پوائنٹس نال ݙوڄھے نمبر تے ہین۔پاکستان دے فخر زمان ہک درجہ ترقی نال ٻارہویں نمبر تے آگئن۔ بالرز رینکنگ اچ شاہین شاہ آفریدی ہک درجے تنزلی دے بعد اٹھویں نمبر تے لڳے ڳن۔ پاکستان دے سٹار کرکٹر بابراعظم سارے فارمیٹس دی رینکنگ اچ ٹاپ فائیو اچ موجود ہین۔ ٹیسٹ بیٹرز رینکنگ اچ نیوزی لینڈ دے کین ولیمسن پہلے نمبر تے اتے بابراعظم پنڄویں نمبر تے ہین۔ ٹی ٹونٹی بیٹرز رینکنگ اچ محمد رضوان تریڄھے اتے بابراعظم چوتھے نمبر تے ہین۔
