اسلام آباد۔22فروری(اے پی پی سرائیکی نیوز سروس : ڈاکٹر سعدیہ کمال) پاکستان دیاں مادری زباناں دے ادبی میلے تے پاکستان اچ لسانیات تے تحقیق موضوع تے گالھ مہاڑ کریندے ہوئے ما ٻولی دے جڳ ݙیھاڑ تے عصمت اللہ شاہ اے پی پی سرائیکی نیوز سروس نال ڳالھ مہاڑ کریندے ہوئیں آکھیے جو سرائیکی لسانیات دے حوالے نال سائنٹیفک بنیاداں تے بنیادی کم غیر ملکی ماہرین لسانیت کیتے، ابتدائی طور تے انہاں چوݙویں والیم اچ سرائیکی زبان اتے اوندے علاقیاں کوں متعین کیتا ہئی۔ بعد اچ ایڈور وبائن گلاسری آف ملتانی لینگویج دا سندھی اتے پنجابی زباناں دا تقابلی جائزہ گھدے جیندے اچ سرائیکی اکھاݨ، کجھ لوگ گیت وی ہن جیکوں جیب وسلن ودھا تے 5 ہزار الفاظ تے چھپوائی، پہلی گلاسری 1881 اچ، ݙوجھی 1900 اتے تریجھی 1965 اچ چھپی ڄݙاں جو چوتھی پروفیسر شوکت مغل 2002 اچ چھپوائی ہئی۔ بعد اچ اینڈریو جیوس ڈیرہ غازی خان اچ ٻہہ تے بائبل دا ترجمہ کیتا اتے ایندے اچ اوکھے لفظاں دی تعداد گھٹ ودھ 10 ہزار ہئی انہاں کوں سرائیکی توں انگریزی اتے انگریزی توں سرائیکی اچ ترجمہ کیتے۔ ایویں ہی سمرنوف رشین ہک ماہر لسانیات وی لہندی زبان دے نال نال سرائیکی دی کتاب “سرائیکی دی لینگویج ” لکھی جیندے اچ سرائیکی دے 6 لہجے نشابر کیتن جیندے وچ معیاری لہجہ ملتان مظفر گڑھ دا قرار ݙتے، خالص سرائیکی صرف شہر اچ ٻولی ویندی اے۔ مقامی ماہرین لسانیات وی سرائیکی زبان تے وݙا کم کیتا اے ۔
