اسلام آباد۔14مارچ (اے پی پی) پاکستان اتے مشرقی ایشیا دے ملکاں وچال ݙوطرفہ تجارت دے حجم اچ جاری مالی سال اچ ودھارا ریکارڈ کیتا ڳئے ، مشرقی ایشیا دے ملکاں کوں پاکستانی برآمدات اچ سالانہ بنیاد تے30.49 فیصد جݙاں جو انہاں ملکاں توں درآمدات اچ 8.78 فیصددی نموریکارڈکیتی ڳئی ۔ سٹیٹ بینک دے اعدادوشمارموجب جولائی توں جنوری 2024 تئیں چین، جاپان، جنوبی کوریا تے مشرقی ایشیا دے ٻئے ملکاں کوں برآمدات توں ملک کوں 2.145ارب ڈالرزرمبادلہ ملیے جیڑھا جو گزریل مالی سال دی ایں مدت دے مقابلے اچ 30.49فیصدزیادہ اے، گزریل مالی سال دی ایں مدت اچ مشرقی ایشیا دے ملکاں کوں برآمدات توں ملک کوں 1.644 ارب ڈالرزرمبادلہ ملیا ہئی ۔ جنوری اچ مشرقی ایشیا دے ملکاں کوں 307.082 ملین ڈالردی برآمدات ریکارڈکیتیاں ڳئن جیڑھیاں جو دسمبراچ 308.96 ملین ڈالرتے گزریل سال جنوری اچ 200.66 ملین ڈالرہن۔ مالی سال 2023 اچ مشرقی ایشیا دے ملکاں کوں برآمدات توں ملک کوں 2.740 ارب ڈالردا زرمبادلہ ملیا ہئی ۔
