اسلام آباد۔22مارچ (اے پی پی سرائیکی نیوز سروس : ڈاکٹر سعدیہ کمال)اکادمی ادبیات دی چیئرمین ڈاکٹر نجیبہ عارف آکھیے جو اکادمی ادبیات پاکستان اچ اڄ یوم پاکستان دے حوالے نال ھک سیمینار منعقد کیتا ڳیا جیں دا عنوان ہئی”پاکستان ادب اچ قومی شعور” ایندا مقصد اے ہئی جو پاکستان دی ادبی تاریخ اچ جیویں ادیباں آپݨے قومی شعور دا اظہار کیتے اوندے تے ھک جھاتی پاتی ونڄے۔نہ صرف اینکوں بلکہ پاکستان دیاں ٻیاں زباناں دے ادب کوں وی ݙٹھا وںڄے اتے اے ݙٹھا وںڄے جو پاکستانی ادیب کیویں آپݨی قومی ذمہ واری نبھائی اے۔مقررین ایں حوالے نال ٻہوں عمدہ مقالاجات پیش کیتن۔ انہاں آکھیے پاکستانی ادیب قیام پاکستان توں گھن تے اڄ تئیں ہمیشہ آپݨی قومی صورت حال کوں چنڳے طریقے نال بیان وی کیتے تے ایندی رہنمائی وی کیتی اے۔ قومی شعور دا مطلب محبت دا اظہار نی قومی ترانے نی بلکہ قوم دے مسئلیں بارے ݙسائے۔ اوندی سیاسی سماجی معاشی صورت حال توں آگاہی تھیوے۔
