اقوام متحدہ۔26مارچ (اے پی پی):پاکستان غزہ اچ جنگ بندی دے مطالبے تے مبنی اقوام متحدہ دی سلامتی کونسل دی قرارداد دا خیرمقدم کریندے ہوئیں ایں ڳالھ تے زور ݙتے جو وݙے انتظاردے بعد منظورتھیوݨ آلی قرارداد تے عمل درآمد تھیوݨا چاہیدے ۔اقوام متحدہ اچ پاکستان دے مستقل مندوب منیر اکرم گزریل ݙینھ سلامتی کونسل دی قرارداد دی منظوری دے حوالے نال اے پی پی کوں ݙسایا جو اساں اقوام متحدہ دے چارٹر دے آرٹیکل 25 موجب سلامتی کونسل دی ایں قرارداد تے وختی عمل درآمد دا مطالبہ کریندوں ۔ ایں چارٹردے آرٹیکل دی شرطاں دے تحت، اقوام متحدہ دے رکن ملکاں 15 رکنی کونسل دے فیصلیں تے عمل درآمد کرݨ تے متفق ہن۔ پاکستانی مندوب آکھیے جو غزہ اچ اسرائیل دی وحشیانہ مہم کوں روکݨ سانڳے اے پہلا قدم ہووݨا چاہیدے ۔ پاکستان جون 1967 توں پہلے دی سرحداں تے مشتمل ھک محفوظ، قابل عمل اتے خودمختار فلسطینی ریاست دے قیام دے ذریعے ھک منصفانہ، جامع اتے پائیدار حل سانڳے فعال طور تے کم کریندا رہسی ۔ جیں دا دارالحکومت القدس الشریف ہووے۔ سلامتی کونسل دی قرارداد اچ رمضان المبارک اچ وختی جنگ بندی اتےغزہ اچ امداد ودھاوݨ دی وختی لوڑھ دا مطالبہ کیتا ڳئے ۔ قرارداد دی حمایت اچ 14 ووٹ پئن جݙاں جو امریکا ووٹنگ اچ حصہ نی ڳھدا۔
