ملتان۔ 26 مارچ (اے پی پی) سرائیکی دے جڳ مشہور شاعر مشتاق سبقت 63 سال دی عمر اچ حرکت قلب بند تھیوݨ پاروں مظفرگڑھ اچ انتقال کرڳئن ۔مشتاق سبقت ھک سکول اچ استاد ہن تے پوری عمر تدریس دے شعبے نال جڑیے رہیے ، انہاں دا تعلق محمود کوٹ توں ہئی جنہاں کوں سرائیکی خطے اچ مزاحمتی شاعری دے حوالے نال ڄاݨیا ویندے ۔انہاں دی وفات تے پورے خطے اچ ٻہوں ݙکھ تے افسوس کیتا ویندا پئے ۔مشتاق سبقت دا نماز جنازہ منڳل دی سویل اݙہ ٹرک آلا چوک محمود کوٹ اچ پڑھیا ڳئے ۔معروف سرائیکی دانشورظہور احمد دھریجہ ، سابق رکن قومی اسمبلی مہر ارشاد سیال ، شریف خان لاشاری سودھے سینکڑاں لوکاں انہاں دی نماز جنازہ اچ شرکت کیتی ۔اے پی پی نال ڳالھ مہاڑ کریندے ہوئیں ظہور احمد دھریجہ آکھیے اے محمود کوٹ دی تاریخ دا ساریں توں وݙا جنازہ ہئی، مشتاق سبقت ایں خطے دی آواز ہن او لوکاں دے ݙکھاں کوں زبان ݙیندے ہن۔
