سیول ۔2اپریل (اے پی پی) جنوبی کوریا دے مصنوعی سڄ ’’کے سٹار‘‘جوہری ری ایکٹر 100 ملین سینٹی گریڈ درجے تے 48 سیکنڈ تئیں کم کر تے عالمی ریکارڈ ٻھن فتے۔ نشریاتی ادارے سی این این دے مطابق کوریا فیوژن انرجی انسٹیٹیوٹ (کے ایف ای) دے سائنس داناں دا ہدف کے سٹار جوہری ری ایکٹر کوں 100 ملین سینٹی گریڈ درجے تے ممکنہ حد تئیں لمبے عرصے کیتے چلاوݨ اے۔ ایں ری ایکٹر دا نظام سڄ اتے ٻئے ستاریاں کوں چمکاوݨ آلے ردعمل دی تقلید اے اتے چلدیں ویلھے ری ایکٹر ٻہوں شدید درجے تے گرمی پیدا کریندے۔ جنوبی کوریا دے سائنسداناں اڄوکے تجربے اچ ری ایکٹر پلازمہ کوں 48 سیکنڈ تئیں 100 ملین درجے تے چلاوݨ اچ کامیاب رہیے، اے درجہ سڄ دے مرکزے توں ست گنا ودھ گرم اے۔ اینویں ای 2021 دا 30 سیکنڈ دا ریکارڈ ترٹ ڳئے۔ کیسٹار ریسرچ سینٹر دے ڈائریکٹر سی۔وُو یون آکھیا جو اتنے شدید گرمی کوں مستقل رکھݨ سوکھا کم کائنا ہئی۔ انہاں آکھیا جو اساں 2026 تئیں ری ایکٹر کوں مسلسل 300 سیکنڈ تئیں چلاوݨ دا ہدف رکھیندوں۔
