اسلام آباد۔17اپریل (اے پی پی سرائیکی نیوز سروس: ڈاکٹر سعدیہ کمال):اکادمی ادبیات پاکستان “پاکستانی زبانوں کے ادبی عجائب گھر” دے منصوبے تحت مجلس تحقیق دا اجلاس سݙیے جیندی صدارت معروف ادیب تے دانشور محمد حفیظ خان کیتی جݙاں جو مجلس دے سیکریٹری محمد عاصم بٹ اجلاس دی کارروائی سنبھالی ۔ مجلس دے کارکن اچوں غلام حسن بٹ، اسماعیل گوہر، سید ماجد شاہ، پروفیسر ڈاکٹر فوزیہ جنجوعہ، ڈاکٹر منظورویسریو، پناہ بلوچ، ڈاکٹر ضیاءالرحمن بلوچ، ڈاکٹر اختر عزیزاجلاس اچ شریک تھئے ۔ گلگت بلتستان دے اراکین بوجوہ شریک نہ تھی سڳیے ، انھاں نال برقی ذرائع نال رابطہ کیتا ڳیا۔ اجلاس اچ عجائب گھر کیتے پاکستانی زباناں دے متعلق بنیادی معلومات دی تدوین کوں حتمی شکل ڈیوݨ تے غور کیتا ڳیا ۔ اجلاس دے اخیر تے مجلس دے اراکین نال اکادمی ادبیات پاکستان دی صدر نشین پروفیسر ڈاکٹر نجیبہ عارف تے ناظم اعلیٰ سلطان ناصر ملاقات کیتی جیندے اچ صدرِ مجلس تے اراکین اجلاس دی کارروائی تے روشنی پاتی تے ݙسایا جو ایں اہم تے حساس نوعیت دی ذمے واری توں اے مجلس جلدی ای احسن طریقے نال کم کر گھنسی۔پاکستانی زباناں دا مطلوبہ مواد تیار کرڳھدا ویسی تاں جو ایں کوں عجائب گھر اچ شامل کر ڳھدا ونڄے ۔ اجلاس دے بعد سارے اراکین زیرِ تعمیر “پاکستانی زبانوں کے ادبی عجائب گھر” دا دورہ کیتا تے ایندے تے خشی دا اظہار کریندے ہوئے ایکوں پاکستانی زبان تے ادب دے حوالے نال بے حد اہمیت دا حامل منصوبہ قرار ݙتا ۔ اراکین دا آکھݨ ہا جوپاکستانی زباناں دا اے ادبی عجائب گھر پاکستان اچ آپدی طرز دا پہلا تے انوکھا منصوبہ اے جیندے تے اکادمی ادبیات مبارک باد دی مستحق اے ۔
