اسلام آباد۔29اپریل(اے پی پی سرائیکی نیوز سروس: ڈاکٹر سعدیہ کمال):پروفیسرعرفان جمیل دا سرائیکی نیوز سروس اے پی پی نال خصوصی ڳالھ مہاڑ اچ آکھݨ ہئی جو سرائیکی شاعری بارے میکوں ٻہوں سارے تحفظات ہن جݙاں میں شاعری دا سامعی یا قاری ہم اوں ویلھے سرائیکی شاعر نال ھک گلہ ہئی جو سرائیکی شاعر آپݨی شاعری دا ھکو رخ ای ݙیکھیندا پیا ہئی۔ جیندے اچ سنڄ ، ٻر، بھک تے صرف ہجراتے محرومی دی ڳالھ ہئی ۔انہاں آکھیے ݙٹھا ونڄے تاں ݙوجھے پاسے زندگی دے ٻہوں سارے سوہݨے منظر وی ہن اوں پاسے ساݙے شاعر دی توجہ کائناں ہئی۔ انہاں آکھیے میں ہݨ وی کوئی ایجھی شاعری پڑھداں جتھاں میکوں بھک محرومی دی ڳالھ نظر آندی اے تاں میں سوچینداں جو ساݙے شاعر دی نظر وسعت کیوں نی اختیار کریندی پئی۔انہاں آکھیے ہݨ ساݙے جیڑھے نینگر شاعر آندے پئن انہاں دی شاعری اچ نویں تے وکھری چیز نظر آندی پئی اے۔ ایندے اچ ٻہوں چنڳی ڳالھ اے ہے جو اے شاعری ہݨ ریکارڈ وی تھیندی پئی اے اتے موسیقی اچ وی ایں تے غزلاں تے گیت آندے پئن اتے اے ھک ٻہوں حوصلہ افزا ڳالھ اے۔ انہاں آکھیے جے میں آپݨی شاعری بارے ڳالھ کراں توں شعوری طور تے میں کوشش کیتی اے جیڑھے اردو غزل تے فارسی دے مضامین ہن اوں پاسے وی توجہ کیتی ونڄے۔
