اسلام آباد۔9مئی (اے پی پی سرائیکی نیوز سروس، ڈاکٹر سعدیہ کمال) مہاندرے شاعر اتے ادیب سئیں رفعت عباس آکھیے جو عام لوکاں دے احساسات کوں اڳونہا کرݨ ہی میݙی شاعری دی پسندیدگی دی وجہ اتے سنڄاݨ اے، بکھ، کریہہ اتے احساس محرومی ساݙے وسیب، دھرتی اتے معاشرے دا وݙا مسلہ اے جیندے تے فن و ادب اتے شاعری دے ذریعے الاوݨ نال ہی ایندا کوئی حل اتے ازالہ کیتا ونڄ سڳدے۔ او اسلام آباد اچ اکادمی ادبیات پاکستان ولوں کمال فن ایوارڈ دی تقریب نال خطاب کریندے پئے ہن۔’’کمال فن ایوارڈ ‘‘ ہر سال کہیں وی ہک پاکستانی اہل قلم کوں انہاں دی حیاتی دی ادبی خدمات دے اعتراف اچ ݙتا ویندے جیندا اجراء اکادمی ادبیات پاکستان 1997ء اچ کیتا ہئی۔ ایں توں پہلے اکادمی ادبیات پاکستان معروف ادیب جناب حسن منظررکوں مہاندرے اہل قلم دی ادبی خدمات سانڳے کمال فن ایوارڈ2022 ݙتے۔ایں موقع تے ’ ’قومی ادبی ایوارڈز‘‘ برائے سال2022ء دا اعلان وی کیتا ڳئیا۔
