مقبوضہ بیت المقدس۔29مئی (اے پی پی) فلسطینی پناہ گزیناں کیتے اقوام متحدہ دی ریلیف اینڈ ورکس ایجنسی ( یو این آر ڈبلیو اے ) آکھیا جو رفح اچ اسرائیلی فوج دی بمباری پاروں گزریل ترائے ہفتیاں اچ ݙاہ لکھ فلسطینیاں نقل مقانی کیتی اے، انہاں لوکاں کنے نہ خوراک اے نہ پاݨی انہاں دی مدد تے حفاظت ناممکن اے۔ العربیہ اردو موجب اقوام متحدہ دے جائزے موجب غزہ جنگ اچ 15 لکھ فلسطینیاں غزہ دے جنوب اچ واقع شہر رفح اچ پناہ ڳھدی ہئی، ایں مہینے دے شروع اچ اسرائیلی فوج رفح تے حملہ کیتا، اسرائیلی فوج فسلطینی پناہ گزیناں کوں آکھیا جو او رفح شہر خالی کر ݙیون۔ یو این آر ڈبلیو اے حکام دے موجب پناہ گزیناں کوں پتہ کائنا ہئی جو رفح توں نکل تے انہاں کتھ ونجݨے، رفح توں کݙھیے ڳئے فلسطینیاں کنے خوراک اے نہ پاݨی، انہاں دی مدد تے حفاظت ناممکن اے۔
