ریاض ۔4جون (اے پی پی) سعودی عرب، اردن، متحدہ عرب امارات، قطر اتے مصر دے وزرائے خارجہ ہک ورچوئل اجلاس اچ غزہ دی صورتحال تے ڳالھ مہاڑ کیتی۔ ایس پی اے موجب مصر، قطر اتے امریکا ولوں ثالثی دی کوششاں، یرغمالیاں اتے قیدیاں دی رہائی، مستقل جنگ بندی غزہ اچ امداد ݙیوݨ کیتے ہک معاہدے تئیں پڄݨ دی کوششاں دا جائزہ ڳھدا ڳئیا۔ سعودی عرب، اردن اتے امارات دے وزرائے خارجہ انہاں کوششاں دی حمایت جاری رکھݨ دا یقین ݙوایا۔ عرب وزرائے امریکی صدر جوبائیڈن ولوں پیش کیتی ڳئی تجویزاں تے وی بحث کیتی۔ وزراء امریکی صدر دی پیش کیتی تجویزاں تے سنجیدگی اتے مثبت انداز نال عمل کرݨ دی اہمیت تے زور ݙتا جئیں دا مقصد ایجھے معاہدے تئیں پڄݨ اے جو غزہ پٹی دے سارے حصیاں اچ مستقل جنگ بندی اتے امداد دی فوری ترسیل دی ضمانت ݙیندے۔
