اسلام آباد۔28جون(اے پی پی):وزیراعظم محمد شہباز شریف آکھیے دہشت گردی دے خلاف خیبرپختونخوا دے عوام ساریں توں ودھ قربانیاں ݙتن ،2010ء اچ ہووݨ آلے این ایف سی ایوارڈ دے تحت دہشت گردی دا شکار تھیوݨ پاروں ایں صوبے کوں 590 ارب روپے ہݨ تئیں ݙتے ڳئن جݙاں جو سی ٹی ڈی دا ادارہ صوبے اچ مکمل نی تھی سڳیا ، خیبر پختو نخوا وانڳوں ٻئے صوبیں وی دہشت گردی دا سامݨا کیتے جݙاں جو انہاں کوں ایں مد اچ کجھ نی ملیا ، چیف سیکرٹری خیبر پختونخوا دی تعیناتی سانڳے 3نا ویں دا پینل بھجوایا ڳئے ایں حوالے نال صوبائی حکومت توں کوئی جواب نی آیا ، جے ایں پینل اچ شامل ناں منظور نی تاں ݙساون اساں نواں پینل بھیج ݙیسوں قومی اسمبلی اچ اسد قیصر دی طرفوں چاتے ڳئے نکتے دا جواب ݙیندے ہوئیں وزیراعظم آکھیے اسد قیصر لائق احترام ہن انہاں دیاں ڳالھیں غور نال سݨئن ، انہاں این ایف سی دے حوالے نال ڳالھ کیتی اے ، این ایف سی ایوارڈ 2010 اچ تشکیل پاتا، اوں ویلھے دے وزیراعظم یوسف رضا گیلانی دی سربراہی اچ چارے صوبیں رل تے ایں تے اتفاق کیتا ہئی ۔ وزیراعظم آکھیے ایں ویلھے ملک اچ دہشت گردی عروج تے ہئی جیں دا ساریں توں ودھ شکار صوبہ خیبرپختونخوا ہئی، اتھاں دے عوام عظیم قربانیاں ݙتن جنہاں کوں تاریخ یاد رکھیسی انہاں آکھیے اس این ایف سی ایوارڈ دا میں وی حصہ ہامی جیں تے دستخط بلوچستان اچ تھئے ہن انہاں آکھیے ایں این ایف سی ایوارڈ اچ صوبیں دے حصے اچوں خیبرپختوخوا دا حصہ ھک فیصد رکھیا ڳیا ہئی جیڑھا ہݨ تئیں اینکوں ملدا پئے ہݨ تئیں 590 ارب روپے دہشت گردی دے خلاف انھاں دیاں کوششاں دے اعتراف اچ ملیے انہاں بلاشبہ وݙیاں قربانیاں ݙتن، بلوچستان سودھے ٻئے صوبیں وی وݙیاں قربانیاں ݙتن جݙاں جو انہاں کوں کجھ نی ملیا ۔ خیبرپختونخوا اچ سی ٹی ڈی تئیں نی بݨ سڳی۔590 ارب دے باوجود سی ٹی ڈی نامکمل اے، اساں سیاست نی کرݨ چاہندے ۔
