اسلام آباد۔9جولائی (اے پی پی ) شعبہ سرائیکی زبان تے ادب اسلامیہ یونیورسٹی بہاول پور دے وفد پروفیسر اطہرلاشاری دی قیادت اچ ادارہ فروغِ قومی زبان اسلام آباد دا دورہ کیتا۔وفد ادارے دے ڈائریکٹر جنرل پروفیسر ڈاکٹر محمد سلیم مظہر نال ملاقات کیتی۔
ایں موقع تے ادارے دے ایگزیکٹو ڈائریکٹر ڈاکٹر راشد حمید، اے پی پی شعبہ سرائیکی دی سربراہ ڈاکٹر سعدیہ کمال اتے ڈاکٹر محمد شفیق احمد تے تجمل شاہ وی موجود ہن ۔ پروفیسر ڈاکٹر محمد سلیم مظہر وفد کوں خوش آمدید اکھیندے ہوئے آکھیا جو تعلیمی اداریاں دے طلباء اتے محققین دے علمی تے ادبی اداریاں دے دورے نال انھاں دی علمیت اچ ودھارے دے نال انھاں دی شخصی تے عملی ترقی تھیندی اے۔
ایگزیکٹو ڈائریکٹر ڈاکٹر راشد حمید ادارے دی کارکردگی دے حوالے نال وفد کوں تفصیلی آگاہ کیتا،وفد دے سربراہ پروفیسر اطہر لاشاری ڈاکٹر سعدیہ کمال دا شکریہ ادا کریندے ہوئے آکھیا جو انھاں دے توسط نال اساکوں ایں اہم قومی ادارے بارے جاݨݨ داموقع ملئے ۔آخر اچ ڈائریکٹر جنرل وفد کوں ادارے دیاں مطبوعات وی پیش کیتیاں ۔(ڈاکٹر سعدیہ کمال)
