اسلام آباد- 13 جولائی( اے پی پی) صدارتی ایوارڈ یافتہ سرائیکی دی وݙی تے پہلی افسانوی مجموعے دی لکھاری مسرت کلانچوی دا سرائیکی ناول “تاݙے ٹوبھے لاݨے” چھپ ڳئے
سرائیکی زبان و ادب دے استاد ڈاکٹر عصمت اللہ شاہ عظیم لکھاری مسرت کلانچوی تے انھاندی لکھت بارے اے پی پی نال ڳالھ کریندے آکھیا جو مسرت کلانچوی دھرتی نال جڑی او باکمال تخلیق کار ھن جنہاں جݙاں وی قلم چاتے، وسیب اتے وسیب واسیاں دی ڳالھ ھی کیتی ھے۔کافی عرصے توں وسیب توں پرے ھوونڑ دے باوجود وی وسیب انہاں دے اندروں نی نکل سڳیا ۔ انہاں دا اے ناول وی سرائیکی دھرتی،اوندی ثقافت،اوندے نال جڑئیے مسائل اتے اوندے واسیاں دے وکھو وکھ روئیے آتے مختلف رنگ نشابر کریندے۔میکوں پک ھے جو اےناول آپݨےاسلوب ،موضوع اتے فنی پختگی دے حوالے نال قاری کوں ضرور متاثر کریسی اتے سرائیکی ادب اچ ھک شان دار ودھارا ثابت تھیسی۔
سرائیکی دے وݙے شاعر تے لکھاری رفعت عباس اے پی پی نال ڳالھ مہاڑ کریندے ڈسائے جو مسرت کلانچوی سرائیکی فکشن دا ماݨ ہن۔انہاں دیاں کہانیاں(افسانے)سرائیکی وسوں دے نال نال جگ جہان دی کتھا نانویں آپدا اعتبار قائم کیتے۔روہی چولستان وچوں نسرن والے انہاں دے تہذیبی تے ثقافتی بیانیے دی گھمبیرتا ایں دھرتی دیاں کئی گجھیاں پرتاں کھولن۔ساݙے صحرائی سماج دی حیاتی وچوں انسانی ورتاریاں دیاں کئی پرتاں نشابر کیتن۔انہاں دیاں کتھاواں وچوں اساں ہک ٻئے کوں سمجھݨ جوڳے تھئے ہیں۔ایہو اعتبار تے جانڑوندی ہی کہیں فکشن دی سپھلتا ہوندی ہے۔حیاتی کوں آپدی جاہ تے ویلے وچوں آپݨی اکھ نال ڈیکھݨ تے ڈکھاوݨ ہی کتھاکاری ہے۔ مسرت کلانچوی دا ناول “تاݙے ٹوبھے لاݨے”سرائیکی فکشن دی ہک نویں تاکڑی اے (ڈاکٹر سعدیہ کمال)
