پنسلوانیا ۔14جولائی(اے پی پی) سابق امریکی صدر ڈونلڈ ٹرمپ انتخابی ریلی اچ فائرنگ پاروں سر اچ سٹ لڳݨ پاروں زخمی تھی ڳئن ۔ وائس آف امریکا سیکرٹ سروس دے حوالے نال ݙسائے پنسلوانیا اچ ھک انتخابی ریلی اچ صدر تے گولیاں چلائیاں ڳئن جیں دے نتیجے اچ ریلی اچ شریک ھک بندہ ہلاک ݙو زخمی تھئن ۔ ھک سوشل میڈیا پوسٹ اچ ڈونلڈ ٹرمپ آکھیے انہاں تے گولی چلائی ڳئی جیڑھی انہاں دے سڄے کن دے اتلے حصے کوں لڳی ۔ انہاں آپݨے ٹروتھ سوشل پلیٹ فارم تے لکھیے میکوں وختی پتہ لڳ ڳیا جو کجھ غلط ہئی ، میں ھک گونج سݨی، گولیاں چلیاں تے ھک گولی میݙی جلد اچ لڳی ۔ کافی خون وھہہ ڳئے ، ول میکوں پتہ لڳیا جو کیا تھئے ۔ خدا امریکا تے مہربان ہووے۔ٹرمپ دی انتخابی مہم دے ترجمان سٹیو چنگ آکھیے ٹرمپ محفوظ ہن، ٹرمپ وختی مدد کرݨ آلیں تے قانون نافذ کرݨ آلیں دا وختی کاروائی تے شکریہ ادا کیتے ۔سابق صدر بش اتے صدر اوباما سودھے امریکی لیڈراں اتے عالمی رہنماواں ایں واقعے دی مذمت کیتی اے ۔ صدر بائیڈن اپݨے بیان آکھیے میکوں اے سݨ تے خوشی تھئی اے ڈونلڈ ٹرمپ محفوظ ہن تے چنڳاں محسوس کریندے پئن ۔ امریکی صدر آکھیے میں انہاں تے انہاں دے ٹٻر سانڳےدعا کرینداں اساکوں مزید اطلاعات دا انتظار اے۔ صدر بائیڈن مزید آکھیے ایہو جیہے تشدد دی امریکا اچ کوئی جاہ کائنی تے اساکوں ھک قوم وانڳوں ایندی مذمت کرݨی چاہیدی اے۔انہاں امید ظاہر کیتی جو میݙی وختی ٹرمپ نال ڳالھ تھیسی ۔ سیکرٹ سروس دے ترجمان انتھونی گگلیلمی ایکس تے ھک پوسٹ اچ آکھیے سیکرٹ سروس حفاظتی اقدامات تے عمل کیتے سابق صدر محفوظ ہن ۔بٹلر کاؤنٹی دے ڈسٹرکٹ اٹارنی رچرڈ گولڈنگر ایسوسی ایٹڈ پریس کوں ݙسائے جو مشتبہ گن مین ہلاک تھی ڳئے
