اسلام آباد۔ 19 جولائی (اے پی پی) سرائیکی زبان دے ناول نگار تے لکھاری محمد حفیظ خان دی شاعراں تے خاکياں دي نویں کتاب “سرائیکی سخنور” چھپ گئی. سرائیکی زبان دے ناول نگار تے لکھاری محمد حفیظ خان دی نویں کتاب ” سرائیکی سخنور” چھپ گئی اے جیندے اچ 9 شاعراں دے تفصیلی مضمون شامل ان ۔ اے گالھ مہاڑ حفیظ خان اے پی پی سرائیکی نیوز سروس نال کیتی۔انھاں دا آکھنڑ ہا جو شاعری کوں میں ایجھی حیات آفریں اکائی دے طور تے گھنداں جیڑھی آپدے ماضی کوں بدل کے رکھ ڈیندی اے تے میڈے نیڑھے شاعری دی ایسا تعریف اے جو ایندے وجود اچ آونڑ توں بعد او قوم یا خطہ جتھ اوں جنم گھدے، ہک نویں حساسیت گھندی اے تے اینویں شاعری ای او کڑی اے جیڑھی انسان دے کل کوں اوندے اج نال جڑیندی اے ۔خوش نصیبی اے جو سرائیکی شاعری دی اے کڑی کڈاہیں وی نی ترٹی۔۔انھاں دا بیا آکھنڑ ہاجو میڈی 9 سرائیکی شاعراں دے مضموناں دی نویں کتاب ” سرائیکی سخنور ” جلد ہک اے جیندے اچ سرائیکی ڈوہڑے دے شاعر احمد خاں طارق ، نقوی احمد پوری ، فیض محمد دلچسپ ، اقبال سوکڑی ،ارشاد تونسوی ، عزیز شاہد ، تنویر سحر ، عاشق بزدار تے ظہیر مہاروی شامل ان ۔ایندے اچ 7 مضمون اردو اچ تے ڈوں مضمون ( عزیز شاہد ، ظہیر مہاروی) تے سرائیکی اچ لکھے ہوئے ان ۔ اتے انھاں دا سرائیکی نیوز سروس نال گالھ مہاڑ اچ آکھنڑ ہا جو ایندے بعد جلدی ای سرائیکی سخنور دی ڈوجھی جلد وی چھپ ویسی جیندے اچ سرائیکی شاعر خواجہ عبداللہ اخگر، ممتاز حیدر ڈاہر، نصراللہ خان ناصر، عابد عمیق ، اسلم جاوید ، اشو لال ، اصغر گرمانی ، مخمور قلندری تے جہانگیر مخلص تے مضمون ہوسن ۔۔انھاں دا آکھنڑ ہا جو شاعراں دی چونڑ انھاں ادبی قد کاٹھ کو سامنڑھے رکھیندے کیتا اے جنھاں دی شاعری سماج تے آپدا تاثر چھوڑیا ہووے۔ یاد راہوے جو محمدحفیظ خان ہنڑ تئیں 54 کتاباں لکھ چکئین جیندے اچ 7 ناول ان اتے ترائے ناول بہاول پور بارے لکھئے گئین بھانویں جو محمد حفیظ خان پیشے دے اعتبار نال منصف ہن پر انھاں سرائیکی ادب دی جھولی آپدیاں لکھتاں نال بھر ڈتی اے ۔
